"Намайг хаашаа ч хамаагүй чирээд авч явж болно. Гагцхүү надад зориулсан алга ташилтыг л устгаж болохгүй" хэмээн хэлж байсан хүн бол Луи Армтсронг юм. Ямарваа нэгэн урлагийн төрөлд гоц, гойд тэр тусмаа нэг ёсны билэг тэмдэг болсон хүн гэж байдаг. Жишээлбэл илбэчин Гарри Гудини, аймшгийн киноны загалмайлсан эцэг гэгдэг найруулагч Альфред Хичкок, эрдэмтдээс Альберт Эйнштейн, балетчидаас Галина Уланова гэдэг шиг Жаз урлагийн билэг тэмдэг бол Луи Армстронг юм. "Гартаа бүх утсыг хэн нэгэн хүн атгаад цоо шинэ угалз гаргах тохиолдол байдаг. Тэгвэл хөгжмийн ертөнцөд тийм хүн бол Луи Армсронг байлаа. Хэрэв Армстронг байгаагүй бол орчин үеийн хөгжмийн ертөнц өөр байх байсан. Тиймдээ ч тухайн үеийн суут хүн гэж түүнийг хэлж болно” хэмээн намтар түүх бичигч Жеймс Линколын хэлсэн байдаг ажээ. Луи Даниель Армстронг 1901 оны долдугаар сарын 4-нд Шинэ Орлеанд төрсөн .Түүний эцэг нь бага байхад нь гэр бүлээ хаян явсан бөгөөд тэрбээр хүүхэд наснаасаа эхлэн хар бор ажил хийж, хотын хамгийн ядуу хороололд амьдардаг байжээ. Тэрбээр хүүхэд байхаас жаз хөгжим сонирхдог байсан бөгөөд түүний хөгжмийн гараа Шинэ Орлеаны жаз хөгжмийн хамтлагт тоглож эхэлсэн цагаас л эхэлжээ. 1922 оны үед хөгжимчид түүнийг "Бяцхан луи" хэмээн дуудаг байлаа. Гэхдээ тэр үед тэрбээр 100-аас хол давсан килограмм жинтэй байсан гэдэг. Түүнийг тайзан дээр гараад тоглох үед зарим үзэгчид хашхирч, зарим нь дуугүй сууж, харин зарим нэг нь уйлдаг. Аажмаар Армстронг зөвхөн хөгжимдөх бус дуулдаг болсноор түүнийг хүмүүс илүү их мэдэх болжээ. Түүний дуулж бас бүрээ тоглох үедээ гаргадаг арга барил сонин , содон байдаг нь хүмүүст их таалагдаг байсан ажээ. Тухайн үед түүний хийсэн бүх үйлдлүүд мода болж байлаа. Луи их хөлөрдөг байсан тул байнга гартаа алчуур авч явна. Харин залуучууд мода болгон гартаа алчуур барин явдаг болсон гэдэг. Мөн түүний гэдсэн дээрээ гараа тавьдаг зуршил нь ч мода болж бүгд түүн шиг гартаа алчуур барьж, гараа гэдсэндээ тавьж, яг л түүн шиг дэгжин хувцасладаг болжээ. Луи Армсронг 1952-онд уншигчдын дунд судалгаа явуулж түүнийг бүх цаг үеийн хамгийн алдартай хөгжимчин хэмээн өргөмжилсөн байдаг ба тэрбээр өнөөдрийг хүртэл хүн төрөлхтөнд жаз хэмээх урлагийг үлдээж чадсан аугаа хүн юм. 1971 оны долоодугаар сарын 6-нд тэрбээр таалал төгссөн юм. Маргааш нь АНУ төдийгүй олон орны сонины эхний нүүрэнд түүнийг таалал төгссөн талаар мэдээг нийтэлж түүний оршуулах ёслол телевизээр шууд дамжуулж, 25-н мянган хүн түүнтэй салах ёс гүйцэтгэхээр иржээ. Харин түүний хойдын буянд зориулсан мөргөлийн үеэр жаз-бэнд хөгжим эгшиглэж байсан гэдэг. Ингээд түүний алдарт “What a wonderfull world” дууг хүргэж байна. Энэхүү дуугаар Луи Армстронг Хит Парадад нэгд орсон хамгийн ахмад буюу 66 нас дуучин гэсэн алдрыг хүртэж байжээ. Эх сурвалж: new.mn