Барилга угсралтын “Боорчи” компани өнгөрсөн онд манай аймагт цагдаагийн албан хаагчийн 72 айлын орон сууц барьж ашиглалтад оруулж орон нутгийн удирдлага баяр ёслолын байдалтайгаар ёслолын тууз хайчилж хүлээн авсан. “Боорчи” компанийн удирдлагын зүгээс “...дахин 72 айлын орон сууц барьж хууль, хүчний байгууллагын ажилчдын нийгмийн асуудлыг шийдвэрлэх хүрээнд хөнгөлөлтэй нөхцөлтэй гэрээ байгуулан ажиллаж орон нутагт хүлээлгэн өгнө” хэмээн ёслолын үеэр мэдэгдэж байсан удаатай. Аймгийн тухайн үеийн удирдлага ч тэрхүү саналыг нь дэмжиж буйгаа илэрхийлсэн. Гэтэл өнгөрсөн долоо хоногт Иргэдийн санал гомдлыг хүлээн авах төв, 70353511 тоот утсанд “...цагдаагийн албан хаагчид хөнгөлөлттэй нөхцөлд хамрагдан орон сууцтай болох зорилгоор “Боорчи” компанид их хэмжээний мөнгөө тушаасан боловч гүйцэтгэгч тал одоо болтол алга болсон тул хаана хандахаа мэдэхгүй байна” хэмээн ханджээ. Ийнхүү “Боорчи” компанид холбогдох нэгэн зарга үүссэн байна. Аймгийн цагдаагийн газрын 14 албан хаагч 15-20 сая төгрөгөө байртай болно гээд “Боорчи” компанийн дансанд тушаасан аж. Дээрх 14 албан хаагчийг мөнгөө барилгын компанийн дансанд тушаахад нөлөө үзүүлсэн хүн нь гэвэл аймгийн Цагдаагийн газрын Нийгмийн хэв журмыг хангах тасгийн дарга хэмээн өргөдөл гаргасан хохирогчид гомдолдоо дурдсан бололтой. “Боорчи” компани өнгөрсөн онд цагдаагийн албан хаагчдын 72 айлын орон сууцыг ашиглалтад оруулсан. Энэ байранд 40 гаруй цагдаа нүүж орсон. Үлдсэнийг нь “Боорчи” компани зах зээлд нийлүүлсэн. Энэ байр ашиглалтад орох явцад аймгийн Цагдаагийн газрын зарим алба, хэлтэс, тасгийн дарга нар барилгын компанитай хувийн гэрээ байгуулан байр орон сууц авсан бололтой. Тэрхүү гэрээн дотор цагдаагийн дарга нар дараагийн байрны санхүүжилт босгох үүрэг хүлээсэн ч байж болох тухай ажилчид нь жиг жуг хийж байна. Эндээс харвал “Боорчи” компанийг тойрсон барилгын бизнест аймгийн цагдаагийн газрынхан хамтрагч болсон байж мэдэх гэнэ. Өнгөрсөн жил Нийслэлийн Засаг дарга бөгөөд Улаанбаатар хотын захирагч Э.Бат-Үүл “Боорчи компанитай дахин хэзээ ч гэрээ байгуулахгүй шүү” хэмээн ажлын албаныхандаа лүндэн буулгаж байсан нь хэвлэл, мэдээллээр цацагдасан. Ямар ч байсан аймгийн ЗДТГ, Хууль зүйн хэлтсээс цагдаагийн 14 албан хаагчийн 200 гаруй сая төгрөг луйвардуулсан байж болох асуудалд анхаарлаа хандуулж эхэлжээ.