Ийм шийдвэрийг өнөөдөр хуралдсан аймгийн ИТХ-ын ээлжит 24 дүгээр хуралдаанаас гаргалаа. Тэртээ 1975 онд Ардын их хурлын тэргүүлэгчдийн зарлигаар 1976 оны нэгдүгээр сарын 1-ээс эхлэн Булган аймгийн Эрдэнэт хороог байгуулахаар шийдвэрлэсэн байдаг. Энэ цагаас хойш 40 дэх жилтэйгээ эрдэнэтчүүд бид золгох гэж байна.   Эрдэнэт хороо нь анх байгуулагдахдаа 1655 өрхийн 7800 гаруй иргэнтэй байсан бол өнөөдрийн байдлаар 25 мянган өрхийн 92 гаруй мянган оршин суугчтай болсон байна. Аймгийн ИТХ-ын ээлжит 24 дүгээр хуралдааны хэлэлцсэн эхний асуудал нь “Эрдэнэт хотын өдрийг бий болгох тухай” байв. Хуралдааны дэд дарга Р.Цэрэндорж энэ асудлыг хэлэлцүүлж төлөөлөгчдийн олонхийн саналаар жил бүрийн нэгдүгээр сарын 1-н буюу эхний өдрийг Эрдэнэт хотын өдөр болгохоор шийдвэрлэв. Үүний дагуу аймгийн ИТХ-ын тогтоолоор Эрдэнэт хотын өдрийг жил бүр тэмдэглэж, тогтоолын хэрэгжилтийг хангаж ажиллахыг аймгийн Засаг дарга С.Дангаасүрэнд даалгасан байна. Аймгийн ИТХ-ын ээлжит 24 дүгээр хуралдаанаар “Аймгийн орон нутгийн санхүүгийн эх үүсвэрийг нэмэгдүүлэх талаар 2011-2014 онд баримталсан бодлогын хэрэгжилт, цаашид тавих зорилтын тухай”, “Аймгийн 2014 оны төсвийн гүйцэтгэл, 2015 онд тодотгосон төсөв батлах тухай”, “Төсөв санхүү, үйлдвэрлэл эдийн засгийн хөгжлийн хорооны дүгнэлт”, “2014 оны улс орон нутгийн төсвийн хөрөнгө оруулалтын төсөл, арга хэмжээний үр дүн, Орон нутгийн хөгжлийн сангийн зарцуулалт, Төрийн болон орон нутгийн өмчит байгууллагуудын санхүүгийн Аудитын нэгдсэн дүнгийн тухай” зэрэг асуудлыг хэлэлцэхээр төлөвлөжээ.