Захиргааны хэргийн анхан шатны 11 дүгээр шүүх Орхон, Булган аймгийн нутаг дэвсгэрийн бүх нэгжийг харьяалан зохион байгуулагдсантай холбогдуулан тус шүүхээс алслагдсан сумын иргэдэд хүрсэн дараахь ажлыг хийсэн байна. Захиргааны хэргийн шүүхийн үйл ажиллагааг сурталчлах, шүүхийн нээлттэй өдөрлөгийг зохион байгуулах зорилгоор ерөнхий шүүгч Б.Болормаа, шүүгч Г.Гантуяа, Б.Мөнхжаргал, шүүгчийн туслах Д.Сэржмядаг, Г.Энхбат, шүүх хуралдааны нарийн бичгийн дарга Т.Эрдэнэзаяа, 7 дугаар тойргийн Тахарын албаны шүүх хуралдааны журам сахиулагч Ж.Батжаргал нарын бүрэлдэхүүн өнгөрсөн сарын 5-9-ний өдрүүдэд Булган аймгийн Рашаант суманд нүүдэллэн ажиллав. Тус сумын төрийн захиргааны байгууллагын ажилтан албан хаагчид, иргэдэд эрх зүйн сургалт хийж, Захиргааны хэргийн анхан шатны 11 дүгээр шүүхийн 2014, 2015 оны 1 дүгээр улирлын шүүн таслах ажлын талаарх мэдээллийг хүргэлээ. Нээлттэй өдөрлөгийн үеэр ерөнхий шүүгч Б.Болормаа “Дашийсүрэнгийн нэхэмжлэлтэй Булган аймгийн Рашаант сумын Засаг даргын Тамгын газрын даргад холбогдох захиргааны хэрэг”-ийг хянан шийдвэрлэж, шүүгч Б.Мөнхжаргал иргэдэд “Захиргааны байгууллага, албан тушаалтнаас гаргаж буй захиргааны актын талаарх гомдол гаргах эрх”, “Газар эзэмших, ашиглахтай холбогдсон маргааны талаар шүүхэд хандах эрх” сэдвүүдээр сургалт явуулж, шүүгч Г.Гантуяа өдөрлөгт оролцсон иргэдийн сонирхсон асуултад хариуллаа. Шүүгчийн туслах Д.Сэржмядаг, Г.Энхбат нар “Захиргааны хэргийн анхан шатны 11 дүгээр шүүхийн танилцуулга”, “Нэхэмжлэл гаргах, нэхэмжлэлийн бүрдүүлбэр”-ийн хоёр төрөл, Захиргааны хэргийн шүүх, захиргааны байгууллага, албан тушаалтны тухай ойлголт”, “Захиргааны хэргийг урьдчилан шийдвэрлэх журам”-ын хоёр төрөл,  “Захиргааны хэргийн оролцогч, түүний эрх, үүрэг”, “Хэрхэн гомдол гаргах”, “Газар эзэмших эрх зөрчигдсөн асуудлаар шүүхэд нэхэмжлэл гаргах тухай хоёр төрөл, “Захиргааны актын төрөл“ сэдвүүдээр гарын авлага, тараах материал бэлтгэж, нийт 220 ширхэг гарын авлага тараан, сургалтад оролцсон 31 хүнээс шүүх байгууллагын үйл ажиллагааны талаар санал асуулга авсан байна. Г.Энхбат