Их Монгол улс байгуулагдсаны 809, Ардын хувьсгалын түүхт 94 жилийн ой үндэсний их баяр наадам тун удахгүй болох гэж байна. Манай аймгийн хувьд баяр наадмаа 134 сая төгрөгөөр хийхээр болжээ. Саяхан хуралдсан аймгийн ИТХ-ын тэргүүлэгчдийн хуралдаанаар  баяр наадмын төсвийн хуваарийг баталсан байна. Энэ удаад аймгийн баяр наадмыг тэмдэглэн өнгөрүүлэхэд орон нутгаас 100 сая төгрөг, “Эрдэнэт үйлдвэр” ХХК наадмын хурдан морины уралдааныг 20 сая төгрөгөөр ивээн тэтгэх, баяр наадмын үеэрх худалдаа үйлчилгээний тусгай зөвшөөрлөөс 14 сая төгрөгийг олох юм байна. Хурлын үеэр аймгийн ИТХ-ын тэргүүлэгчид зарим нэг зарчмын санал гаргаж шийдүүллээ. Тухайлбал, тэргүүлэгч Ш.Ганбат “Аливаа баяр наадам чинь чимэглэлдээ байдаг. Энэ  хуваариас харахад реклам сурталчилгаанд нэг ч төгрөг тусгаагүй байна. Тиймээс Хог хаягдалд байгаа 9.7 сая төгрөгийн 2.7 саяыг нь реклам чимэглэлд зарцуулах саналтай байна” гэв. Тэргүүлэгч Ж.Ганчимэг “Хогны 9.7 сая төгрөгийг хасч болохгүй ээ. Наадмын хоёр өдөр цэнгэлдэх хүрээлэн түүний ойр орчмын газар, морь барианы газруудад маш их хог гардаг. Түүнийг нь Хот тохижуулахын хэдэн ажилтан л цэвэрлэж наадамчдыг ая тухтай цэнгүүлдэг. Иймээс энэ мөнгөнөөс хасах хэрэггүй болов уу” хэмээсэн юм. Тэргүүлэгчдийн дарга Б.Мягмарсүрэн “Энэ хуваарилсан мөнгө төгрөг чинь хүрэх үү. Сайн анхаарах хэрэгтэй шүү. Тухайлбал, цэнгэлдэхийн төв асрын өмнөх асрын хуванцар дээвэр хагарсан байсан. Сая үйлдвэрийнхэн баяраа хийхдээ хөх өнгийн хулдаасаар бүтээсэн харагдсан. Баяр наадмын нээлт, хаалтын  хоёр сая төгрөгийн зардлаас тэр асрын дээврийг янзлах бол мөнгө төгрөг нь хүрэх үү. Энэ талаас нь  наадмын комиссынхон сайн анхаарч ажиллах хэрэгтэй” гэлээ. Аймгийн баяр наадмыг зохион байгуулах комиссыг Засаг даргын орлогч Д.Энхбатаар ахлуулан байгуулсан агаад хурдан морь, бөх, сур, шагайн харвааны дэд комисс ч баярын өдрүүдэд ажиллах аж.