“Эрдэнэт ДЦС” ТӨХК-ийн Инженер техникийн албаны дарга Б.Сурмаахоролтой уулзаж, цаг үеийн асуудал болох өвөлжилтийн бэлтгэлийн талаар ярилцсан юм. -Ирэх өвөл бичин жилийн зуд болох таамаг яриа их гарч байна. Эрдэнэт ДЦС эрдэнэтчүүдийг өнөтэй өвөлжүүлэх бэлтгэлээ хэр хийж байна вэ. Өвөлжилтийн бэлтгэл одоогийн байдлаар хэдэн хувьтай байна вэ? -Бид нэг зуухандаа засвар хийж байна. Одоогоор 80 орчим хувийн гүйцэтгэлтэй яваа. Бид энэ сарын 20-н гэхэд усны шахалтаа хийгээд, гэмтлээ арилгаад, аравдугаар сарын 1-н гэхэд засварын ажил дуусна. Манай станц долоон зуухтай, жилд нэг зуухандаа их засвар хийдэг хуваарийн дагуу ажиллаж байна. Өвөл дөрвөн зуухаа ажиллуулж, цаана нь гурван зуух бэлэн байна гэсэн үг. Бэлтгэл нөөц, тоноглолтой учраас айх аюул бага. Нүүрс нөөцлөлтийн хувьд одоо 15 мянган тонн нүүрс талбай дээр буулгасан. Энэ байгаа нүүрсний хэмжээ нь одоо ажиллаж байгаа хоёр зуухны 16-17 хоногт хэрэглэх нөөц юм. Эрчим хүчний сайдын тушаалаар аравдугаар сарын 1-н гэхэд 20 мянган тонн нүүрс талбай дээрээ нөөцөлсөн байх ёстой гэж заасан. Бид хуваарийн дагуу нүүрс нөөцлөлтийг хийж байна. Иймд аравдугаар сарын 1-ний дотор 20 мянган тонн нүүрс нөөцөлж чадна. Шарын голын уурхай энэ жил сайн ажилласан. Нүүрсний чанарын хувьд ярихад, тааруу байгаа ч нөөцлөлтийн хувьд санаа зовох зүйл байхгүй. Станц есдүгээр сарын 10-нд нягтын туршилт хийдэг. Аж ахуйн нэгжүүд дулаан авахад бэлэн байгааг шалгаж, өндөр даралтаар дулаан өгдөг. Энэ шалгалтыг явуулсны дараа аж ахуй нэгжүүд тэнд гарсан гэмтлээ арилгах хэрэгтэй. Өөр өөрийн гэмтлээ засна, манайх шугамын гэмтлээ засна. Манай байгууллагатай шууд гэрээтэй ажилладаг газрууд биднээр гэмтлээ засуулж болно. Тухайн байгууллага мэргэжлийн слесарьгүй байвал батлагдсан тарифын дагуу манайхаас үйлчилгээ авах боломжтой. Есдүгээр сарын 15-наас халаалт өгөөд эхэлнэ. Өвөлжилтийн бэлтгэл ажил төлөвлөгөөний дагуу 82 хувьтай байна. Манай станц өвөлжилтийн бэлтгэлийг хангахдаа өөрийн зүгээс хамаарах бүхнийг хийж, бэлтгэл сайн хангаж байна. -Шарын голын нүүрсний уурхайгаас танай станц татан авалтаа хийж байна. Энэ нүүрснээс иргэдэд худалдах ажлыг зохион байгуулах бололцоо байдаг уу? -Манайд тийм зүйл байхгүй. Өөрийн хэрэглэх нөөцөө татаад, байх ёстой нөөцөө бариад явна. Харин өөрийн байгууллагын гэр хороололд амьдардаг ажилчиддаа хоёр тонн нүүрс хөнгөлөлттэй үнээр олгодог. Өнгөрсөн жил Хотын захирагчийн алба, аймгийн Засаг даргын тамгын газраас иргэдэд хөнгөлөлттэй үнээр нүүрс нийлүүлэх боломж байна уу гэсэн албан бичиг ирүүлж байсан. Бид судалгаа хийж үзсэн боловч хүндрэлтэй байдал үүсэхээр байсан. Нэг уурхайгаас татдаг, манайх онцгой обьект учир энд байрлуулах боломжгүй гээд бэрхшээлтэй олон асуудал байдаг. М.Мөнх