Аймгийн АН-ын дарга, УИХ-ын гишүүн М.Батчимэгийн зөвлөх З.Пагмажав эх орноосоо урвасан хэргээр шүүхээс чанга дэглэмтэй хорих ангид 16 жилийн хугацаатай хоригдох ял сонсоод байгаа билээ. Энэ мэдээлэлтэй холбогдуулан аймгийн АН-ын хорооны гишүүд намын дарга М.Батчимэгийг огцруулахаар гарын үсэг цуглуулж эхэлжээ. Аймгийн АН-ын хороо 93 гишүүнтэй аж. Төрийн ажилд шилжсэн, бурхан болсон гишүүдээ хасвал яг өнөөдрийн байдлаар 89 гишүүн бүртгэлтэй. Тэдний 60 гаруй нь намын даргаа огцруулах тухай бичигт гарын үсэг зураад байгаа аж. Мөн 10 гаруй хүн огцруулах тухай шаардлагыг дэмжиж гарын үсэгээ зурахаа мэдэгдсэн байна. Тэдний хувьд хөдөө орон нутаг, нийслэлд ажил төрлийн шугамаар яваа учир байр сууриа ийнхүү утсаар илэрхийлсэн гэнэ. УИХ-ын гишүүн М.Батчимэгийн хувьд 2014 оны арванхоёрдугаар сард аймгийн намын хорооны даргаар дээрээс мундагдуулж байж өөрийгөө сонгуулсан гэж намын зарим нэг жирийн гишүүн нь хүртэл үздэг. Намын хорооны гишүүдийн олонхийн байр суурь нь “Аймгийн намын хорооны даргын эрх мэдлийг гартаа аваад тамга, тэмдгийг нь Улаанбаатар тийш авч одсоноос хойш намын хорооны гишүүдийн хурлыг ганц удаа ч хийгээгүй, улмаар гүйцэтгэх зөвлөлийн хуралдааныг ч энэ есөн сарын хугацаанд хуралдуулаагүй” зэрэг нь гишүүдийн хувьд даарин дээр давс нэмсэн үйлдэл болжээ. Зарим нэг гишүүний хувьд өөрсдийнх нь гараар босгосон Ардчиллын ордны нүүр царайг будсанаас өөртоймтой ажил хийгээгүй, ажилчид нь өдөр тутмын ажлаа хүртэл Улаанбаатар руу утасдаж, М.Батчимэг даргаас зөвшөөрөл авдаг болсон зэрэг нь ардчиллын үндсэн зарчимд харш хэмээн үзэж байгаа аж. Хатагтай М.Батчимэгийн хувьд орон нутагт ирэхдээ аймгийн намын хорооны дарга гэхээсээ илүүтэй УИХ-ын эрхэм гишүүний байр сууринаас ханддаг нь гишүүдийнх нь хувьд шүүмжлэлтэй хандахад хүргээд байгаа бололтой. Ямар ч байсан аймгийн АН-ын хорооны 89 гишүүний олонхи нь даргаа огцруулах тухай гарын үсэг цуглуулж байгаагаас харвал Ардчиллын цэнхэр ордон дотор тун удахгүй “намрын халуун өдрүүд” эхлэх нь тодорхой болжээ. Даргыг огцруулах гарын үсэг зурж эхлэхтэй зэрэгцэн аймгийн АН-ын өөрсдийгөө лидер хэмээн биеэ тоодог зарим нэг эрхэм албан тушаал, тамга тэмдгийн төлөө энд тэнд нууц уулзалт мэр сэр зохиож буй бололтой. Аймгийн АН даргаа өөрчлөх үү аль эсвэл З.Пагмажав гэх эмэгтэйн асуудал гурван шатны шүүхээр эцэслэн шийдэгдсэний дараа М.Батчимэг дарга огцруулах тухай албан бичгийн хариуг өгөх үү гэдэг асуултын хариу тун удахгүй тодрох нь ээ.