Орхон аймгийн хүүхэд залуучуудын театр 24 дэх удаагийн өвөл цагийн үзвэрийн нээлтээ эхлэж байна.Хүүхэд залуучуудын театр өвөл цагийн нээлтээр 4-р улиралд хамгийн түрүүнд хүүхэд залуучууддаа зориулан бүтээх уран бүтээлүүдээсээ дээжлэн хүргэхээр төлөвлөөд байгаа бөгөөд тус театрын зураач ,Гэгээн муза-2015 оны шагналт Б.Сайханбаярын “ЦАГААС ЦАГТ” уран бүтээлийн үзэсгэлэн, Олон улсын “Ялагчдын цуваа” моно жүжгийн уралдааны шилдэг дүрийн эзэн жүжигчин Г.Мишээлийн “БИ ГЭДЭГ АРД ТҮМЭН-эгоизм шүлгүүд”номын нээлтийн үйл ажиллагааг зохион явуулна. Тус театрын хувьд өвөл цагийн нээлтийн үйл ажиллагааг илүү өвөрмөц, шинэлэг байдлаар хийхээр төлөвлөөд байгаа бөгөөд нээлтийн үйл ажиллагаандаа ЕБС-ын хэл уран зохиолын багш нар болон түүх,нийгмийн багш нарын урьж байгаа юм байна.Ингэснээр боловсролын байгууллагын хөтөлбөр, чиглэлийг уран бүтээлдээ тусган хэрэгжүүлэх зорилт тавин ажиллахаар төлөвлөөд байгаа ажээ. Өвөл цагийн үзвэрээрээ ард иргэд, үзэгчдэдээ илүү нээлттэй байж уран бүтээлүүдээ улам илүү баялаг болгон, шинэ менежмент, шинэ санааг агуулсан уран бүтээлүүдийг хийх зорилт тавин ажиллаж байна. Мөн театрынхаа дэргэдэх цирк ангийн уран бүтээлүүд болон театр студийг шинээр байгуулж, хүүхэд залуучуудыг урлагт дуртай, сонирхолтой болгох ажлуудыг санаачлан ажиллаж эхлээд байна. Өвөл цагийн нээлтийн үйл ажиллагааныхаа хүрээнд мөн 2015 оны 10-р сарын 20-ноос эхлэн ЕБС-ын сурагчдад зориулан “Илбэчин тогоруу” хүүхэлдэйн жүжиг, Ульяам Шекспирийн сонгодог зохиолуудын цоморлигоос хүргэхээр бэлтгээд байгаа ажээ.Улаанбаатар хотоос томоохон найруулагч, уран бүтээлчдийг урин авчирч, хамтран уран бүтээл хийхээс гадна хүүхэд багачууддаа зориулсан өнөө үеийн шилдэг үлгэрийн баатруудын дүрээр шинэ жүжгүүдийг хийх зэрэг олон ажлуудыг төлөвлөн ажлаа эхлүүлээд байна.