Аймгийн Засаг даргын захирамжаар орон нутагт хийгдэж байгаа бүтээн байгуулалт ажлыг эрчимжүүлэх, гүйцэтгэлийн явцад хяналт тавих, энэ талаарх мэдээллээр хангахад чиглэгдсэн дөрвөн ажлын хэсгийг байгуулсан ажээ.Боловсрол, соёл урлаг, эрүүл мэнд зэрэг нийгмийн салбарт он дамжин хийгдэж байгаа болон 2015 онд хийгдэж буй ажлуудыг шуурхай удирдлагаар хангах ажлын хэсгийг Нийгмийн хөгжлийн хэлтсийн дарга Б.Нацагдорж ахалсан байна. Харин авто замын шинэчлэлийн ажлын хүрээнд шуурхай удирдлагаар хангах ажлын хэсгийг Хотын захирагчийн албаны дарга Б.Батжаргал, гэрэлтүүлгийн шинэчлэл, цахилгаан дамжуулах агаарын шугам болон дэд өртөө барих ажлуудыг удирдлагаар хангах ажлын хэсгийг Хот байгуулалт, барилга захиалагчийн албаны дарга С.Даваасүрэн, Эрдэнэт хотын болон гэр хорооллын инженерийн шугам сүлжээний шинэчлэлийн ажлыг шуурхай удирдлагаар хангах ажлын хэсгийг Засаг даргын орлогч Д.Энхбат нар ахалсан 4 ажлын хэсэг ажиллаж байна.Ажлын хэсгүүдээс даваа гарагийн Засаг даргын шуурхай дээр мэдээлэл хийсэн юм. 2015 онд орон нутгийн төсвийн хөрөнгө оруулалтаар хийж буй авто замын ажлын явц — 2015 оны автозамын хөрөнгө оруулалтын ажлын гүйцэтгэл 68.5 хувьтай байна. Дэнжийн гурван байр, Баян-Өндөрийн гудамж, Баян-Өндөр-Хантайн гудамж, Наран-Шанд, тавдугаар хорооллын өргөтгөл шинэчлэлтийн асфальт бетон хучилтын ажил дууссан. Автозамын тэмдэг тэмдэглэгээг хийсэн. —Автозамын ажлыг дуусгахад хөрөнгийн асуудлыг шийдэж, гүйцэтгэлийн санхүүжилтыг олгох шаардлагатай байна. Дэнж багийн 3 байрны автозамын шинэчлэлтийн асфальт бетон хучилт дууссан. Техникийн комисс ажилласан. Улсын комисст хүлээлгэж өгнө. Баян-Өндөрийн гудамжны 1.49 км автозамын засвар, шинэчлэлтийн ажил асфальт бетон хучилт дууссан. Урьдчилсан комисс ажиллана. Баян-Өндөр- Хантайн гудамжийг холбосон 0,402 км автозамын ажлын асфальт бетон хучилт дууссан, урьдчилсан комисс ажиллана. Наран-Шандын 2,4 км автозамын асфальт бетон хучилт дууссан, явган замын хавтан тавих ажил 90 хувь хийгдсэн. Гэрэлтүүлэг, орц гарцан дээр хоолой тавих ажил үлдсэн. Баянцагаан багт хатуу хучилттай автозам барих ажлын далангийн суурийн ажил хийгдсэн. Явц 50 хувийн гүйцэтгэлтэй хийгдэж байна. Яргуйт багт 2,05 км хатуу хучилттай автозам барих ажил суурийн далангийн 80 хувь хийгдсэн, хайрган үе хийж байна. Асфальт бетон хучилт авахад бэлдэж байна. Тавдугаар хорооллын автозамын өргөтгөл шинэчлэлтийн ажлын үлдэгдэл ажил хийгдэж дууссан. Жаргалант сумын Арцадын давааг засварлах ажил хийгдэж дууссан. Орхон, Улаан-Үүдийн гудамжны уулзварын өргөтгөлийн ажил газар шорооны ажил хийгдсэн, хучилт хийх бэлтгэл ажил хийгдэж байна. Нутгийн удирдлагын ордны урд талын хатуу хучилттай автозамын өөрчлөлтийн газар шорооны ажил дууссан, хучилтын бэлтгэл ажил хийгдэж байна. Автозамын тэмдэг, тэмдэглэгээ хийх ажил дууссан. Урьдчилсан үзлэг ажиллана. Хотын доторх Автозамын нөхөөс хийх ажил 50 хувьтай хийгдэж байна.