“Эрдэнэт үйлдвэр” ХХК-ийн төв байрны “Оюу” танхимд талууд гэрээнд гарын үсэг зурах ёслол боллоо. Орхон аймгийн иргэдийг төлөөлж ИТХ-ын дарга Б.Мягмарсүрэн, “Эрдэнэт үйлдвэр” ХХК-ийн Ерөнхий захирлын үйлдвэрлэл эрхэлсэн орлогч захирал Д.Даваасамбуу, “Зэс эрдэнийн хувь” ХХК-ийн Төлөөлөн удирдах зөвлөлийн дарга Д.Алтанхуяг нар Исэлдсэн хүдрийн овоолгыг ашиглах тухай гурван талт гэрээнд гарын үсэг зурж баталгаажуулсан юм. Ингэснээр 20 гаруй мянган гишүүнтэй “Зэс эрдэнийн хувь” компанийн хувьд исэлдсэн хүдрийн овоолгыг ашиглан Зэс хайлуулах хамгийн орчин үеийн, байгаль орчинд ээлтэй үйлдвэр байгуулах боломж бүрдэж байгаа ажээ. Гарын үсэг зурах ёслолд аймгийн Засаг даргын орлогч Д.Энхбат, “Эрдэнэт үйлдвэр” ХХК-ийн Ерөнхий захирлын Хөгжлийн асуудал эрхэлсэн захирал Б.Намхайнямбуу, Санхүүгийн асуудал эрхэлсэн орлогч захирал Б.Алтанхуяг, Гадаад худалдааны асуудал эрхэлсэн орлогч захирал Б.Болдбаатар, Хуулийн хэлтсийн дарга А.Цэрэнсодном нар болон “Зэс эрдэнийн хувь” ХХК-ийн төлөөлөл оролцсон юм. “Зэс эрдэнийн хувь” компанийн Зэс хайлуулах үйлдвэр ашиглалтад орсноор 130 гаруй хүн шинээр байнгын ажлын байртай болохын зэрэгцээ, аймаг, орон нутгийн төсөвт жил бүр долоон тэрбум төгрөгийн татвар төлөх гэнэ. Үйлдвэрийг барьж байгуулан ашиглалтад оруулахад 90 гаруй тэрбум төгрөг шаардлагатай байгаа ч үүнийгээ өмнөд хөршийн хөрөнгө оруулалтаар шийдэх боломжтой гэж төслийн санаачлагчид мэдэгдлээ. “Зэс эрдэнийн хувь” ХХК-ийн Зэс хайлуулах үйлдвэрийн гүйцэтгэх захирлаар Эрдэнэтийнхэний дунд “Эрдминийн Даамиа” хэмээн хүнлдэгдсэн аж үйлдвэрийн гавьяат ажилтан Б.Дамдинжав ажиллаж байна. Ийнхүү Шинэчлэлийн Засгийн газрын тэргүүн Н.Алтанхуягийн дэмжлэгтэйгээр анхны ажлаа эхлүүлж байсан “Зэс эрдэнийн хувь” компанийн зэс хайлуулах үйлдвэр байгуулах “галт тэрэг” хөдөллөө. Өнөөдрийн гурван талт гэрээний үр дүнд Эрдэнэтийн хонхорт дахин нэг зэс хайлуулах үйлдвэр 2-3 жилийн дотор босох боломж бүрдэж байна.