Улсын төсвийн 4.2 тэрбум төгрөгийн хөрөнгө оруулалтаар манай аймагт 100 ортой хүүхдийн эмнэлгийн шав тавих ёслол боллоо. Шав тавих ёслолд Эрүүл мэнд, спортын яамны Төрийн нарийн бичгийн дарга С.Ламбаа, УИХ-ын гишүүн М.Батчимэг, аймгийн ИТХ-ын дарга Б.Мягмарсүрэн, аймгийн Засаг даргын орлогч Д.Энхбат, “Эрдэнэт үйлдвэр” ХХК-ийн Ерөнхий захирлын Хөгжлийн асуудал эрхэлсэн орлогч захирал Б.Намхайнямбуу, Нийгмийн асуудал эрхэлсэн орлогч захирал С.Сувдаа болон албаны хүмүүс эмнэлгийн ажилтан албан хаагчид оролцов. Аймаг, орон нутгийн удирдлагийн зүгээс 2013 оноос эхлэн БОЭТ-ийн Хүүхдийн тасгийг өргөтгөх, их засварын ажил хийх чиглэлээр Эрүүл мэндийн яам болон Засгийн газар, УИХ-д удаа дараа асуудал тавьж хүсэлт гаргасны үндсэн дээр асуудал шийдэгдэж 100 ортой хүүхдийн эмнэлгийн барилгын ажил эхлэх боломж бүрджээ. Эрүүл мэнд, спортын яамны Төрийн нарийн бичгийн дарга С.Ламбаа энэ үеэр хэлсэн үгэндээ “Орхон аймгийн удирдлага хүүхдийн эмнэлгийн өргөтгөлийн асуудлыг эртнээс тавьж асуудлыг шийдвэрлүүлэхээр ажилласан. Аймгийн Засаг даргын зүгээс энэ хугацаанд эрүүл мэндийн салбарт олон ажил хийж түүнийхээ хэрээр багагүй хэмжээний хөрөнгө оруулалт оруулжээ. Өрхийн эмнэлгийг нэгдсэн байртай болгохоор эхлүүлсэн нь шинэлэг ажил болсон байна. Мөн одоо байгаа хүүхдийн эмнэлэгтээ багагүй хэмжээний ажил хийсэн нь харагдана. Өнөөдөр бид 100 ортой хүүхдийн эмнэлгийн шавыг тавих гэж байна. Энэ барилга ирэх арваннэгдүгээр сарын 1-н гэхэд ашиглалтад орно. Барилгын гүйцэтгэгч компанийн хамт олон ч энэхүү бүтээн байгуулалтын ажлыг цаг хугацаанд нь амжуулахаа амлаад байгаа” хэмээн онцоллоо. Өнгөрсөн өвөл Эрүүл мэнд, спортын яам, улмаар Худалдан авах ажиллагааны газарт болсон Орхон аймгийн БОЭТ-д 100 ортой хүүхдийн эмнэлэг барих 4.2 тэрбум төгрөгийн тендэрт “Цомбон тоосго” ХХК шалгарч ийнхүү барилгын ажил эхэлж байна.