Орхон аймгийн Шүүхийн тамгын газраас “Нээлттэй хаалганы өдөр” зохион байгуулж, иргэдэд мэдээлэл өглөө. Гэр хорооллын эцэст байрладаг“Төрийн үйлчилгээний нэг цонхны нэгдсэн төв”-ийн байранд шүүхийн нэг цонхны үйлчилгээ нээсэн байна. Иргэд шүүхэд хандах өргөдөл, нэхэмжлэлээ заавал шүүхийн байр руу очиж өгөх шаардлагагүй, багуудын нэгдсэн төв байранд ирж зөвлөгөө авах боломжтой юм. Гэр хорооллын иргэдэд шүүхээс үзүүлж байгаа үйлчилгээг түргэн шуурхай, чирэгдэл багатай, нэг дороос хүргэх зорилготой юм. Өнөөдрийн“Нээлттэй хаалганы өдөрлөг”-өөр иргэд шүүхийн Тамгын газраас шүүхтэй холбоотой бүхий л мэдээллийг өгсөнөөс гадна шүүх хэрхэн шинэчлэгдэж байгаа талаар мэдээллээ. Шүүхэд иргэдийн төлөөлөгчийн үүрэг, шүүхийн үйл ажиллагаанд оролцож байгаа бүрэлдэхүүний нөлөөллийн мэдүүлэг ямар ач холбогдолтой зэрэг мэдээллийг нэг дороос авах боломжтой. Мөн шүүгчийн шийдвэртэй холбоотой санал хүсэлт, гомдол мэдээллийг иргэдээс авах, хариуг нь өгөх зэрэг боломжийг бүрдүүлж байна. Орхон аймгийн Иргэний хэргийн анхан шатны шүүх энэ оны 1-р улирлын байдлаар нийт 775 нэхэмжлэлийг хүлээн авснаас 552 хэргийг шийдвэрлэж ,107 нэхэмжлэлийг хүлээн авахаас татгалзаж 208 хэргийн үлдэгдэлтэй байна.Мөн дээрх хугацаанд эрүүгийн 72 хэргийг хүлээн авснаас өнөөдрийн байдлаар 58 эрүүгийн хэргийг хянан шийдвэрлэж ,14 хэргийн үлдэгдэлтэй ажиллаж байна.