Зууны манлай бүтээн байгуулалт, Хөдөлмөрийн гавьяаны улаан тугийн одонт, Дэлхийн шилдэг аж ахуйн нэгж, Монгол улсын тэргүүний шилдэг аж ахуйн нэгж Эрдэнэт үйлдвэрийн хамт олон 2016 оны эхний хагас жилийн үйлдвэрлэлийн төлөвлөгөөг бүх үзүүлэлтээр давуулан биелүүлж, улсын болон орон нутгийн төсөвт 71,2 тэрбум төгрөг төвлөрүүлэн 32,4 тэрбум төгрөгийн цэвэр ашигтай  ажилласан өндөр амжилтаар Эрдэнэт хотынхоо 40 жилийн ойг угтаж байна. Дэлхийн зах зээл дээр зэсийн үнэ 8000 ам.доллараас 4700 ам.доллар хүртэл унасан 2013-2016 оны хүнд үеийг даван туулах “Хямралын эсрэг авах арга хэмжээний төлөвлөгөө” боловсруулж ажиллахын зэрэгцээ хүрээд байсан хүчин чадлыг 20 гаруй хувиар өсгөсөн үйлдвэрийн өргөтгөлийг амжилттай хийсний үр дүнд дээрх он жилүүдэд нийт 131 тэрбум төгрөгийн зардал хэмнэж, 128 тэрбум төгрөгийн нэмэлт орлого олж улс, орон нутгийн төсөвт нийт 1,4 их наяд төгрөг төвлөрүүлсэн нь Эрдэнэт хотын уурхайчин хамт олны гар сэтгэл нийлсэн, нөр их бүтээлч хөдөлмөрийн үр дүн байлаа. Нийгмийн хариуцлагатай, оюуны бодлоготой, хөгжлийн хөтөлбөртэй Эрдэнэт үйлдвэрийнхээ хамт олны өмнөөс тус үйлдвэрийн үе үеийн ажиллагсад, анхдагчид, ахмадууд, Эрдэнэт хотын нийт оршин суугчид, залуучууддаа болон Монголын ард түмэн Та бүхэндээ нарлаг Монголын цээжинд ассан найрамдлын Эрдэнэт хот үүсч хөгжсөний түүхт 40 жилийн ойн баярын мэндийг өргөн дэвшүүлж, аз жаргал, амжилт бүтээлийн дээдийг хүсэн ерөөе. ЭРДЭНЭТ ҮЙЛДВЭР ХХК-ИЙН ЕРӨНХИЙ ЗАХИРАЛ, МОНГОЛ УЛСЫН АЖ ҮЙЛДВЭРИЙН ГАВЬЯАТ АЖИЛТАН, ТЕХНИКИЙН УХААНЫ ДОКТОР ЦЭРЭВСАМБЫН ДАВААЦЭРЭН