Аймгийн ИТХ-ын Тэргүүлэгчдийн дарга Б.Мягмарсүрэнгийн нутаг нэгтнүүд Орхон аймгийн төрийн албанд шууд томилогдож, зарим нэг нь томоохон дарга, албан тушаалтан болохоор хор найруулж байгаа бололтой. Ойрын ганц, хоёрхон сарын дотор аймгийн Үйлдвэр, хөдөө аж ахуйн газарт гэхэд хоёр ч хүн Булган аймгаас шилжиж ирээд ажилд оржээ Цагтаа Булган аймгийн Улсын бүртгэлийн газарт тасгийн даргаар ажиллаж байсан Б.Долгорсүрэн гэдэг эмэгтэй хэдхэн сарын өмнө Эрдэнэт хотод шилжиж ирээд 10 жилийн ангийн анд, багын найз, аймгийн ИТХ-ын дарга Б.Мягмарсүрэнгийн хаалгыг 14 хоног сахиж байгаад Нийгмийн хөгжлийн хэлтэст мэргэжилтнээр ажилд орсон аж. Б.Долгорсүрэн тус хэлтэст сар гаруй хугацаанд ажиллаад дараа нь аймгийн Үйлдвэр, хөдөө аж ахуйн газарт Үйлдвэр, газар тариалангийн хэлтсийн даргаар дэвшин ажиллах болжээ. Гэсэн ч хатагтай Б.Долгорсүрэнд хэлтсийн даргын суудал багадсан уу, яасан бэ аймгийн Хөдөлмөрийн хэлтсийн дарга Х.Лувсаншаравын оронд очих хүсэлтээ нутгийн ангийн найз болох Б.Мягмарсүрэн даргад уламжилсан гэсэн яриа ч гарчээ. Үүний дагуу Хурлын даргын зүгээс “комбинац” зохион байгуулах үүрэг хүлээсэн гэх шуум аймгийн захиргаа хавиар хөвөрч байна. Б.Долгорсүрэн Булган аймгаас шилжиж ирээд, Эрдэнэт хотод ажилд орохын тулд АН-д гишүүнээр элсэн орж гэнэ. Бүр Б.Мягмарсүрэн даргын тэргүүлдэг “Шинэ ардчилал клубт элссэн” гэсэн явган яриа Булганы иргэдийн амны зугаа болж байгаа бололтой. Б.Долгорсүрэн цагтаа МАН-ын төлөө улаан гал руу үсрэхээс ч буцахгүй явсан гэж нутгийнхан ярьдаг гэнэ. Тэрбээр Булган аймгийн Улсын бүртгэлийн газрын тасгийн даргаар ажиллаж байхдаа 16 мянган иргэний үнэмлэхний мөнгө идсэн уусан асуудалд холбогдон шалгагдаж байсан гэдгийг Эрдэнэт дэх Булган хангай нутгийнхан ам уралдан ярьдаг ажээ. Аймгийн ИТХ-ын Тэргүүлэгчдийн дарга Б.Мягмарсүрэнгийн багын найз Б.Долгорсүрэнгийн үндсэн мэргэжил нь компьютерийн программист. Улаанбаатар хотод Компьютер техник, менежментийн сургуулийг дүүргэсэн байна. Эндээс харвал Монгол улсын Засгийн газраас үйлдвэр хөдөө аж ахуй салбар тэр дундаа газар тариаланг бодлогоор дэмжиж байгаа. Гэтэл Орхон аймгийн орон нутгийн удирдлагууд Засгийн газар, УИХ-ын бодлого, шийдвэрийг эсэргүүцдэг болсон юм уу гэх хардлага төрж байна. Аймгийн Үйлдвэр, хөдөө аж ахуйн газрын үйлдвэр, газар тариалангийн хэлтсийн даргаар компьютерийн мэргэжилтэй хүн ажилладаг болсон нь мэргэжлийн тариаланчдаас, үйлдвэрлэл эрхлэгчдээс бид улаан нүүрээ хаана хийх вэ гэдэг асуулт өөрийн эрхгүй төрж байх шиг. Орхон аймагт жижиг дунд үйлдвэр эрчимтэй хөгжсөн. Мөн газар тариалангийн хувьд сүүлийн гурван жил дараалан улсын аварга тариаланч хамт олон Жаргалант сумаас төрөн гарсан. Тэрхүү улсын аваргуудад компьютерийн мэргэжилтэй үйлдвэр, газар тариалангийн хэлтсийн дарга ямар зөвлөгөө өгч, мэргэжил арга зүйн удирдлагаар хангах вэ. АН, “Шинэ ардчилал клуб”-т элссэн л бол мэргэжил, ажлын дадлага туршлага хамаагүй ширээний ард суудаг дарга л байх ёстой гэсэн дүрэм гарчээ гэж ойлгогдох болжээ. Мөн аймгийн Үйлдвэр, хөдөө аж ахуйн газрын Мал эмнэлгийн хэлтсийн даргаар Г.Одсүрэн гэдэг эмэгтэй томилогдоод удаагүй. Бас л Булган аймгаас шилжиж ирээд Б.Мягмарсүрэн даргын чихээсээр энэ албан тушаал дээр очсон бололтой. Эндээс харвал Эрдэнэт хотын 100 гаруй мянган хүнээс Үйлдвэр, хөдөө аж ахуйн газарт хэлтсийн дарга хийчихээр боловсрол, чадвартай боловсон хүчин байхгүй гэж үү. Аль эсвэл “Нэг дошны хүүхдүүд” төрийн бус байгууллагын тэргүүн, аймгийн ИТХ-ын дарга Б.Мягмарсүрэн 10 жилийн найз болон нутгийнхаа эгч нарыг албан тушаалд шууд томилоод байна уу. Нөгөө ил тод байдал, нээлттэй шударга ёс, энэ тэр хаана байна. Эсвэл аймгийн дарга нартай хамааралтай хүмүүс шууд албан тушаалд томилогддог дүрэм журам Орхон аймагт үйлчилдэг болсон уу.