УИХ-ын гишүүн О.Баасанхүү “Эрдэнэт үйлдвэр”-ийн 49 хувийн хувьчлалын асуудлаар болон Орхон аймгийн 47-р тойргоос сонгогдсон гишүүний хувьд мэдээлэл хийлээ. Энэ мэдээллийг Улаанбаатарт хийсэн өдрөө Орхон аймагт ирж хэвлэлийнхэнтэй уулзаж ярьсан юм. -Та бүхэн санаж байгаа бол 2013 оноос хойш миний бие “Эрдэнэт үйлдвэр”-ийн 49 хувьтай холбоотой асуудлаар ярьж байсан. Үйлдвэрийн 49 хувь яагаад зарагдав, зарагдаад зогсохгүй өнөөдөр ямар хэмжээнд хүртлээ яригдаж байна вэ. Сонгуульд гарсны дараа бүх хүмүүстэй уулзаад, УИХ-ын анхдугаар чуулган дээр Ц.Нямдорж гишүүн бид хоёр асууж байсан. Ямар ч байсан жил зургаан сарын хугацаанд санаа зовоосон асуудал гайгүй юм байна. Ялангуяа өмч хөрөнгийг нь үрэн таран хийчих, ажилчдыг ажилгүй болгох зэрэг асуудлын хүрээнд ярихад. Харин одоо бидний шахаад байгаа асуудал бол жил зургаан сарын асуудал биш ээ. Эрдэнэтчүүдийг амар тайван байлгаад өгөөч, амьдралыг нь баталгаажуулаад өгөөч. Энэ үйлдвэрийг хэн авахдаа биш, эздүүд нь төр ч байна уу, хувь ч байна уу эрдэнэтчүүдийн төлөө юм хийгээд өгөөч. Анхдагчдыг, ард түмнээ бодоод өгөөч гэж шахаад байгаа юм. Үйлдвэрийн 51 хувийг Засгийн газар, 49 хувь нь хувьд байгаа учир миний тавьж байгаа шаардлага бол УИХ дээр ажлын хэсэг гаргах ёстой. Хоёрдугаарт нь, “Эрдэнэт үйлдвэр”-ийн үе үеийн удирдлагууд нь иддэг, уудаг байсан гэж ярьдаг. Үнэн, худлыг би мэдэхгүй. Үүнийг хууль хяналтын байгууллага мэдэх үүрэгтэй. Үе үеийн удирдлагуудтай холбоотой асуудлыг одоо гаргаж тавиач гэсэн асуудлаар би хэвлэлийн хурал хийсэн. Энэ 49 хувиас болоод намайг нухчин дарах маш их дарамт ирж байна. -Миний ярих дараагийн зүйл бол би Орхон аймгийн 47-р тойргоос сонгогдсон УИХ-ын гишүүн. Миний тойрогт долоон баг харьяалагддаг. Аймгийн Иргэдийн хуралд сонгогдсон төлөөлөгчдийг ярилцаад асуудлаа тодорхой болгоод ороод ирээч. Хамтарч ажиллая гэхээр нэг нь ч ирдэггүй. УИХ-ын гишүүн аль ч намын хүн байх нь хамаагүй, ард нь иргэдийн эрх ашиг гэж бий. Бид Ардын намтайгаа ярьчихсан гээд намайг гадуурхаад тоохгүй байгаа. Уурхайчин багаас сонгогдсон төлөөлөгч өөрийгөө шатаана гэж тэс өөр зүйл ярьсан нь цахим ертөнцөөр гарсан. Шат шатандаа хамтарч ажилламаар байна. Багуудаас саналаа аваад, төсвөө батлаад явах ёстой. Надтай баг болон ажиллах хүмүүсийг дэмжинэ. Улсын хэмжээнд цөөхөнд ордог усан бассейнтэй 7-р цэцэрлэгийн бассейныг ашиглалтанд оруулахгүй байна. Цаашдаа Эрдэнэт Хөгжлийн сантай болох ёстой. Хоёр талаас 100,100 сая доллар гаргаад сан руугаа хийчих. Залуусыг ажилтай болгомоор байна. Энэ аймгийн 120 мянган хүний эрх ашгийн төлөө бид хамгийн түрүүн бодох ёстой. Д.Дамба-Очир, О.Содбилэг хоёр юу ч дуугарахгүй байна. УИХ-ын тогтоол гаргаад, Эрдэнэтийн иргэдийн эрх ашгийг хамгаалах ёстой. Орос ажилтнуудын 300 гаруй орон сууц үлдэнэ -“Эрдэнэт үйлдвэр”-ээс 300 гаруй орон сууц гарах гэж байна. Орос ажилтнууд буцахад тэдний амьдарч байсан орон сууц тэр хэвээрээ үлдэнэ. Үйлдвэрийн 51,49 хувь эзэмшигчид энэ орон сууцнуудыг дуудлага худалдаагаар зараасай гэж би хүсэхгүй байна. Эдгээр байрыг орон нутгийн өмчид оруулаад, амьжиргааны түвшин доогуур иргэд, залуучууддаа өгөөсэй. Байгууллагын орон сууц гэсэн дээр үеийн ойлголтоор эмзэг бүлгийн хүмүүсийн орон сууцыг шийдэх боломж бий. Орон нутагт зам барих зэрэг дэд бүтцийг шийдэхэд төсвөөр шийднэ. Монгол улс төсөвтэй улс, төсвөө шийдэж чадахгүй байна. Үерийн далан барихаар 23 тэрбум төгрөг оруулж ирсэнийг УИХ-ын гишүүд эсэргүүцсэн. Үнэндээ 15 тэрбумаар сум барьдаг байхад, 23 тэрбумаар үерийн далан барина гэж байх ёсгүй төсөв гэж үзээд 6 тэрбум болгож багасгуулсан. Үерийн далан барих хэрэгтэй юү гэвэл хэрэгтэй. Манай тойрог дээр үерийн улмаас хоёр хүүхэд осолдсон хэрэг гарсан. Ийм харамсалтай хэрэг гараасай гэж хүсэхгүй байна. Цэвэрлэх байгууламжийг Франц улсын төсвөөр барьж байхад эргэлтийн хөрөнгөө оруулж ирэхгүй сум шийднэ гэсэн байр суурь хэлсэн. Гэтэл өвөл хөлдөөд хийсэн ажил нь үрэгдчихнэ. Баг бүр өөрийн газар нутаг дээр хийх ажлаа жагсааж оруулж ирээд, аль чухлаас нь эхэлж хийхээр төсвөө гаргах ёстой. Д.Дамба-Очир, О.Содбилэг, миний бие бүгд Эрдэнэтчүүдийнхээ төлөө явахыг хүсэж байгаа. Орон нутгийнханд хэлэхэд,шахааны ажил хийхийн төлөө ажиллахгүй ээ. “Эрдэнэт үйлдвэр”-ээс 30 тэрбумыг авчихсан мөртлөө байшин будсанаас өөр ажил хийгээгүй. Дороосоо яриад, үйлдвэрээс ядаж 10 тэрбумыг аваад хүүгүй зээл болгоё. Үүнийг би хэлж болохгүй, дороосоо баг нь хүсэлтээ гаргах ёстой. Надад орон нутагт ажиллах байр гаргаж өгөхгүй байна -Аймагт гарсан нөхдүүдэд би сэтгэл дундуур байна. Надад орон нутагт ажиллах байр гаргаж өгөхгүй байна. Эсвэл төвөөс хол хоёр давхарт байр өгнө гэсэн. Миний үйлчлүүлэгч надтай уулзах гэж байгаа хүмүүс хөгшчүүл, хөгжлийн бэрхшээлтэй хүмүүс байдаг. Азийн хөгжлийн банкнаас санхүүжүүлсэн Хөгжлийн бэрхшээлтэй иргэдийн сургалтын төв байгуулах төслийг зургаан аймаг авсан. Тэгэхэд манай аймаг хоцорчихсон. Яагаад аваагүй вэ гэхээр иргэдээс саналыг нь оруулж ирээгүй. Дээр байгаа улс төр, хууль журам иргэдээ битгий хохироогооч ээ. Тэгэхээр нам харгалзахгүй хамтарч ажиллаач гэдгийг аймгийн Иргэдийн хурлынханд хэлмээр байна. [sgmb id="1"]