Аймгийн Засаг даргын даваа гарагийн шуурхай зөвлөгөөнөөр аймгийн Цагдаагийн газар, Онцгой байдлын газар, Бүсийн оношлогоо эмчилгээний төвийн удирдлагын мэдээллийг сонслоо. Өнгөрсөн долоо хоногт улс орон даяар сум, дүүргийн ИТХ-ын сонгуулийн санал хураалт, нэмэлт санал хураалт манай аймагт болсон. Энэ ажилд аймгийн Цагдаагийн газрын бие бүрэлдэхүүн өндөржүүлсэн байдалд ажиллажээ. Мөн Цагдаагийн газрын 25 албан хаагч сонгуулийн санал хураалтын ажилд хамгаалалт хийхээр Булган аймагт томилолтоор ажилласан байна. Өнгөрсөн доллоо хоногт аймгийн хэмжээнд Баян-Өндөр сумын Уртын гол, Шанд багт тус бүр нэг гал гарсан бол нэг иргэн золгүй байдлаар амь насаа алдсан тухай цагдаагийн байгууллагаас мэдээллээ. Хүйтний улирал эхэлж байгаа учраас ханиад томуугийн халдвар ихэсч эмнэлэгт хандах иргэд тэр дундаа хүүхдүүдийн тоо өссөн байна. Үүний дараа аймгийн Засаг дарга Д.Батлутаас дараах үүрэг даалгаврыг холбогдох албаныханд өглөө. Нэгд, гудамжны ам хааж барилга барих зөрчил гэр хороололд нэмэгдэж байна. Иргэдээс энэ талаар Тамгын газарт багагүй хэмжээгээр хандаж байгаа. Иймээс Д.Батлут даргын зүгээс дэд бүтэц хариуцсан аймгийн Засаг даргын орлогч С.Батжаргал болон холбогдох албаныханд гал, цагдаа, түргэний машин саадгүй нэвтрэх нөхцөл боломжийг нээх чиглэлээр иргэдээс ирүүлсэн санал хүсэлтийг барагдуулах үүрэг өгөв. Хоёрт, Хот доторх авто замын цэвэрлэгээг хариуцах эзэн алга. Сүүлийн өдрүүдэд ойр ойрхон цас орж халтиргаа, гулгаа үүсч байгаа. Ийм үед хотын доторх замын цэвэрлэгээний ажил эзэнгүй, хэн хийх нь тодорхойгүй байгаа учраас Засаг даргын орлогч С.Батжаргалд цэвэрлэгээний ажлыг эзэнжүүлэх үүрэг даалгавар өгсөн юм. Хотын доторх авто замын цэвэрлэгээг аймгийн хэмжээнд Хот тохижуулах газар, “Орхон АЗЗА” ОНӨҮГ, “Эрдэнэт үйлдвэр” ХХК хариуцдаг аж. Гэтэл сүүлийн үед цас орж халтиргаа гулгаа үүсэн үед “Орхон АЗЗА” компанийн захирал болох н.Баасандоржтой утсаар ярихад нэг бол согтуу байдаг, үгүй бол одоохон хийнэ гэдэг хариу өгдөг удирдлагыг ойлгохгүй буйгаа аймгийн Засаг дарга Д.Батлут онцолсон юм. Гуравт, Фасад будах ажлыг төсөв мөнгөндөө багтаан дуусгах хэрэгтэй. Ирэх оны төсөвт суулгах асуудал байхгүй. Дөрөвт, Аймгийн хэмжээнд 2830 өрхөөс нэг ч хүн ажил эрхэлдэггүй гэсэн судалгаа гарсан байна. Өрх бүрээс нэг иргэнийг ажилтай болгох саналыг гаргаж байгаа. Иймээс холбогдох албаныхан бизнес эрхлэгчидтэй, ТББ-уудтай, олон улсын байгууллагатай хамтран ажиллах хэрэгтэй. Энэ ажлыг ерөнхийд нь зохион байгуулахыг Засаг даргын орлогч А.Түвшинжаргал, Нийгмийн бодлогын хэлтэст үүрэг болгож байна. Тавд, төрийн байгууллагын зүгээс санаачлага гарган ажиллах хэрэгтэй байна. Өнөөдөр олон улсын байгууллага, ТББ-аас ийм ажил хиймээр байна гэж санал гарган орж ирж байна. Гэтэл төрийнхөн үүнийг анзаарахгүй байж болохгүй, хэн хэзээ яах бол гэж өрөөндөө хүлээх биш бид ийм юм хиймээр байна гэтэл нь олон улсын байгууллагыг болон бусдыг өөртөө татах хэрэгтэй байна. Энэ чиглэлээр ажил зохион байгуулах хэрэгтэй. Зургаад, НАКО түлшний асуудал удаашралтай байна. С.Батжаргал дарга холбогдох албаныхан энэ асуудлыг анхаарлаасаа холдуулж болохгүй. Ажлыг эрчимжүүл. Долоод, 7035-3511 дугаарын утсанд иргэдээс ирсэн санал, хүсэлтийг хэрхэн яаж, ямар арга замаар шийдвэрлэснийг гаргаж ирэх хэрэгтэй гэсэн үүрэг даалгаврыг аймгийн Засаг даргын зүгээс өгсөнөөр шуурхай өндөрлөсөн юм. [sgmb id="1"]