Ийм “мессеж” нийслэлээр хөвөрч байгаа бололтой. Твиттерт зарим нэг жиргээч баттай эх сурвалжаас авсан бололтой дээрх мэдээллийг нисгэж байгаа тухай шуугиж байна. Ямар ч байсан зарим нэг албан бус мэдээллээс харвал МАН-ын Удирдах зөвлөлөөс “Эрдэнэт үйлдвэр” ХХК-ийн Ерөнхий захирлаар Ч.Ганзориг, ерөнхий инженер буюу үйлдвэрлэл эрхэлсэн орлогч захирлаар З.Ганбаатар нарыг томилох тухай шийдвэрт хүрсэн бололтой. Энэ сарын 3-нд Засгийн газрын хэрэгжүүлэгч агентлаг Төрийн өмчийн бодлого зохицуулалтын газрын дарга Ц.Ням-Осор Эрдэнэт үйлдвэрийн ТУЗ бүрдсэн тухай мэдээлэл хийсэн. Энэ үеэр хэлсэн үгэндээ “Эрдэнэт үйлдвэр өдгөө 100 хувь Монголын компани болсон бөгөөд шинэ ТУЗ долоон хүнээс бүрдэж байгаа. Үүний дөрвийг нь 51 хувийг эзэмшиж байгаа Засгийн газраас томилсон бол гурвыг нь Монгол зэс компаниас томиллоо” хэмээсэн. Тэрбээр цааш нь хэлэхдээ “Одоо үйлдвэрийн удирдлагыг томилно. Ингэхдээ 51 хувийг эзэмшигчийн талаас Ерөнхий захирлын нэрийг оруулж ирнэ. Энэ хүн Ерөнхий захирал болохын тулд ТУЗ-ийн 7 гишүүний тавынх нь саналыг авсан байх шаардлагатай” гэж мэдэгдсэн. Үнэхээр МАН-ын Удирдах зөвлөлөөс ГОК-ын Ерөнхий захирлаар Ч.Ганзоригийн нэрийг дэвшүүлж байгаа нь үнэн бол түүний хувьд “Монголын зэс” компанийн талын гурван гишүүн болох Да.Ганболд, О.Орхон, М.Мөнхбаатар нараас нэг санал татаж чадвал ТУЗ-өөс Эрдэнэт руу явах “Виз”-ээ авах бололтой. [sgmb id="1"]