Энэ сар гарсаар орон сууцны байруудын халаалт муу байгаа талаар олон иргэнээс гомдол ирсэн. Тиймээс дээрх асуудлыг шийдвэрлэх үүргийг аймгийн Засаг дарга Д.Батлут өнгөрсөн долоо хоногт холбогдох байгууллагуудад өгсөн юм. Ийнхүү Засаг даргаас үүрэг өгсний дагуу “Эрдэнэт Ус” ДТС ОНӨХК-ийн мэргэжилтнүүд гомдол гаргасан айлуудын хаягаар очиж температурт хэмжилт хийжээ.     Дуудлага өгсөн айлуудад хэмжилт хийхэд ихэнхэд нь халаалт хэвийн хэмжээнд байсан аж. Тухайлбал, гал тогооны өрөөний температур 16-18, бусад өрөөний температур 18-21 градус байх нь зохист хэмжээнд тооцогддог гэнэ. Гэхдээ инженерийн шугам сүлжээний “схем” өөрчилснөөс үүдэж тодорхой хэсгүүдэд халаалт муу байгааг тогтоожээ. Тухайлбал, ДГТ-ын 2-р байранд “Сувд” саун, 2-12-р байранд “Гоё” цэцэрлэг, 3-24-р байранд “Ахмадын подволь”, 3-8-р байрны 6-р подволь, 3-9-р байранд “Тогос” салон, “Чамин торго” дэлгүүр зэрэг байгууллагууд “схем” өөрчилсөн байна. Энэ нь тухайн байруудын тодорхой хэсэгт халаалт муу байгаагийн шалтгаан болж байгаа гэж мэргэжлийн хүмүүс үзжээ. Тиймээс шаардлагатай арга хэмжээг авахаар боллоо. Эх сурвалж: Erdenet.mn/Хэвлэл, мэдээлэл, Олон нийттэй харилцах алба [sgmb id="1"]