Шүүхийн ерөнхий зөвлөлийн дарга, доктор, профессор Н.Лүндэндоржоор ахлуулсан ажлын хэсгийнхэн Орхон аймгийн Шүүхийн тамгын газарт ажиллалаа. Орон нутаг дахь энэ удаагийн томилолт нь Булган, Сэлэнгэ, Орхон аймгийн шүүхийн үйл ажиллагаатай танилцаж байгаа юм. Шүүхийн ерөнхий зөвлөлийнхөн аймгийн шүүгч, шүүхийн захиргааны ажилтнуудтай уулзаж, шүүхийн шинэчлэлийн талаар хийж байгаа ажлын талаар мэдээлэл өгч, санал солилцлоо. Энэ удаагийн томилолтын ажлын хэсэгт Шүүхийн ерөнхий зөвлөлийн Гүйцэтгэх нарийн бичгийн дарга, доктор Т.Мэндсайхан, Шүүхийн хэвлэл мэдээлэл, олон нийттэй харилцах хэлтсийн дарга Ш.Отгонцэцэг, референт Ж.Мөнх-Оргил, Э.Золбоо, мэргэжилтэн Б.Цэцэгдэлгэр нар ажиллаж байна. Орхон аймгийн Шүүхийн байгууллага энэ онд 40 жилийн ойгоо тэмдэглэсэн. Одоогийн байдлаар Орхон, Булган, Хөвсгөл аймгийн эрүүгийн хэргийн давж заалдах шатны шүүх, мөн аймгуудын Иргэний хэргийн давж заалдах шатны шүүх, Сум дундын Иргэний хэргийн анхан шатны шүүх, Орхон аймаг дахь Захиргааны хэргийн анхан шатны шүүх, сум дундын Эрүүгийн хэргийн анхан шатны шүүх гэсэн таван шүүх ажиллаж байна. Эдгээр байгууллагад 20 гаруй шүүгч, шүүгчийн туслах, тамгын газарт 30 гаруй ажилтан ажиллаж байна. Орхон аймгийн Шүүх нь бусад аймгуудаас өөрийн байртай, ажилтнуудын ажиллах орчин бүрдсэн аймгуудын нэг юм. Шүүхийн ерөнхий зөвлөлийн дарга Н.Лүндэндорж “2013 онд Шүүхийн ерөнхий зөвлөлийг байгуулснаас хойш Шүүхийн шинэтгэл, шүүгчдийн хараат бус байдлын төлөө тууштай явж, олон өөрчлөлтүүдийг эхлүүлж чадсан нь бидний томоохон амжилт юм” гэж тэмдэглэлээ. [sgmb id="1"]