“Эрдэнэт үйлдвэр”-ийн орлогч захирал болчих санаатай нөхдүүд МАН-ын Удирдах зөвлөл, Бага хурлын хөшигний ард Цагаан байр хавиар эргэлдэж байгаа гэнэ. МАН-ын удирдлагуудын төвшинд ийм нэгэн хувилбар явж байгаа, бараг л шийдэгдэх болов уу гэх албан бус мэдээлэл гарч байна. Үйлдвэрлэл эрхэлсэн дэд захирлаар З.Ганбаатарын нэр дуулдаж байх юм. Тэрбээр гавьяаныхаа амралтад гарсан. Гэхдээ түүнийг энэ албан тушаалд зүтгүүлж буй хүмүүс дотроо юу эсийг төлөвлөснийг хэн мэдэхэв. Харин үйлдвэрийн ажилчдын хувьд одоо байгаа тэтгэвэрийн хөгшнийг бушуухан шиг гавьяаныхаа амралтад гараад зайгаа тавиад өгөөсэй гэж хүсч, хүлээж байгаа нь нууц биш. Аймгийн ИТХ-ын төлөөлөгч, аймгийн Засаг дарга асан Д.Дэлгэрбаярын нэр бас нэгэн орлогч захирлын суудалд  дуулдана. Түүнийг намын дарга М.Энхболдын дэмжлэгээр энэ суудалд сууна гэж таамаглаж буй. Харин бас нэгэн орлогч захирлаар бусдын таамагт төдийлөн нэг их ороогүй “битүү морь” болох хүний нэр дуулдана. Булган аймгийн Засаг дарга асан Маанийн Оюунбат үйлдвэрийн орлогч захирал болох гэнэ. Ирэх онд 60 нас хүрч байгаа түүнийг Булганыхан энэ удаад дэвшүүлэн зайлуулахаар дээд төвшинд тохиролцоо хийсэн сураг чих дэлсэж байна. М.Оюунбат Булган аймгийн Засаг даргаар 12 жил ажилласан. Одоо аймгийн ИТХ-ын даргаар ажилладаг. Булган аймгийн МАН-ын шинэ үеийнхэн түүнийг дэвшүүлэн зайлуусанаар орон нутагтаа өөрсдийн дүрмээр улс төрийн тоглолт хийх боломжтой болно. Энэ оны зун болсон Булган аймгийн ИТХ-ын сонгуулиар орон нутагт МАН, АН-ынхан ойролцоо суудал авчээ. Энэ үеэр М.Оюунбат аймгийн Засаг дарга болохоор зүтгэсэн аж. Харин Булганаас УИХ-ын сонгуульд гарсан “сахал” Д.Бат-Эрдэнэ гишүүн өөрийн хүн болох Г.Батзоригийг  аймгийн Засаг дарга болгосон. М.Оюунбат ч зүгээр хараад суухгүй учраас өөрийн нөхдөө уруу татан АН-ын талд орно гэж намынхнаа айлгасан сураг байдаг. Энэ бүхний эцэст М.Оюунбат аймгийн ИТХ-ын дарга болсон. Харин аймгийн намынхан нь түүнийг Булганы улс төрөөс холдуулахын тулд ийнхүү дэвшүүлэн зайлуулахаар шийдэж багагүй хчиээл зүтгэл гаргасны үр дүнд М.Оюунбатыг Эрдэнэт үйлдвэрийн орлогч захирал болгохоор төлөвлөжээ. Ингэснээр Орхон аймгийн иргэдэд ч ашигтай гэх яриа гарч байна. 2012-2016 онд Булган, Орхон аймагт АН-ынхан төрийн эрхийг атгаж байсан ч хоорондын хамтын ажиллагааны хүрээнд гавьтай ажил хийгээгүй. Дундын суурьшлын бүс байгуулна, дундын нисэх онгоцны буудал хийнэ гэж том том бүлтэрч байсан АН-ынхан амнаас цааш нэг их хол гавиагүй. Харин энэ удаад хоёр аймгийн эрх мэдлийг атгаж байгаа МАН-ын төлөөллүүд багагүй нарийн төлөвлөгөө боловсруулсаны эцэст М.Оюунбатыг үйлдвэрийн орлогч захирал болгож нэг нүүдэл хийнэ. Харин дараагийнх нь нүүдэл бол Булган аймгийн ИТХ-аас манайхнаас гарч байгаа санал санаачлагыг дэмжиж, Дундын суурьшлын бүс байгуулахаас эхэлнэ Дэнж, Эрдэнэ багийнхан Булган аймгийн Бугат сумын нутаг дээр амьдардаг манайхны зовлонг тус аймгийн ИТХ-ын хэмжээнд шийдэхээр талууд тохиролцсон бололтой. Өнөөдөр манай аймгийн улс төрд Булган гэсэн мини фракц байдаг. Нэг хэсэг энэ фракцын нүүр царай нь Б.Мягмарсүрэн байсан бол тэрбээр энэ удаад сул иргэн болсон. Одоо аймгийн улс төрд Булганы фракцыг Д.Дэлгэрбаяр, Д.Мөнхбат, аймгийн Засаг даргын орлогч С.Батжаргал нар төлөөлнө гэж нутгийнхан нь дээлийнх нь захыг мушгидаг гэнэ. Энэ бүхнээс шалтгаалан зарим нэг хүнийг улс төрөөс дэвшүүлэн зайлуулж, Эрдэнэт үйлдвэрийн орлогчоор томилж Ерөнхий захирал Х.Бадамсүрэнгийн хувьд тун удахгүй орлогчуудаа хүлээн авна хэмээн ярьж таамаглаж байна. Үнэхээр ийм болвол Х.Бадамсүрэнгийн багт 51 хувийн буюу төрийн талаас З.Ганбаатар, Д.Дэлгэрбаяр, М.Оюунбат гэсэн МАН-ын төлөөллүүд багтах бол 49 хувийн талаас Ц.Шинэбаатар, Д.Эрдэнэбилэг нар ороод таван орлогч захирал ажиллана. Ц.Шинэбаатар тэргүүн дэд захирал байх бол Д.Эрдэнэбилэг үйлдвэрийн санхүүг атгах юм уу даа. [sgmb id="1"]