Орхон аймгийн түүхт 40 жилийн ой энэ онд тохиож Монгол Улсын Ерөнхийлөгчийн зарлигаар Эрдэнэт хотыг Сүхбаатарын одонгоор шагнасан. Мөн энэ онд Эрдэнэт хотноо тухайн үеийн ЗХУ, өнөөгийн ОХУ-ын Ерөнхий консулын газар байгуулагдсаны 35 жилийн ой энэ өдрүүдэд тохиож байна. Эрдэнэт хот дахь Монгол Оросын найрамдлын нийгэмлэгээс Ерөнхий консулын газар Эрдэнэт хотод үүсэн байгуулагдсаны 35 жилийн ойн хүрээнд олон ажил зохион байгуулжээ. Түүний нэг нь “Эрдэнэт үйлдвэр” ХХК-ийг 1974-1980 оны хооронд их бүтээн байгуулалтын үед удирдаж байсан ЗХУ-ын хөдөлмөрийн баатар, ОХУ-ын гавьяат барилгачин Анатолий Васильевич Чекашовын Эрдэнэт хотод амьдарч байсан байрных нь ханан дээр түүний дурсгалын самбарыг байрлуулан мөнжүүллээ. Дурсгалын самбарыг байршуулах ёслолын ажиллагаанд ОХУ-аас Эрдэнэт хотод суугаа Ерөнхий консул Р.Р.Ракшаев, аймгийн ИТХ-ын тэргүүлэгчдийн дарга П.Пүрэвлхага, аймгийн Засаг даргын орлогч А.Түвшинжаргал, С.Батжаргал, Баян-Өндөр сумын ИТХ-ын дарга Б.Баасансүрэн болон Эрдэнэт үйлдвэрийн анхдагчид, илгээлтийн эздийн төлөөлөл оролцлоо. А.В.Чекашов нь 1974-1980 оны хооронд зургаахан жил Эрдэнэтийн их бүтээн, монголын ажилчин залуус, илгээлтийн эздийг дагалдуулан багш, шавийн холбоо байгуулан ажиллуулсанаар найрамдлын Эрдэнэт хотын бүтээн байгуулалтад мөнхийн гавьяа байгуулсан эрхэм хүн байлаа. Түүний удирдлага дор ажилласан орос монгол ахан дүүс Эрдэнэт үйлдвэрийн эхний ээлжийг хугацаанаас нь  хоёр жилийн өмнө хүлээлгэн өгсөн түүхэн үйл хэргийн удирдагч, манлайлагч нь байсан хэмээн Эрдэнэт хотын Монгол Оросын найрамдлын нийгэмлэгийн тэргүүн С.Мажинбуу энэ үеэр онцолж байлаа. А.В.Чекашов нь 1927 онд ЗХУ-ын Саратов мужид төрсөн агаад барилгын мэргэжил эзэмшсэн тэр цагаасаа хойш их барилгатай ажил амьдралаа холбосон нэгэн байжээ. Тэрээр Хөтөлийн цемент шохойн үйлдвэр, Бор-Өндөрийн жоншны үйлдвэр, нийслэлийн Ээрмэлийн үйлдвэрийг бүтээн байгуулах, Хөтөл, Бор-Өндөр хотыг байгуулахад гар бие оролцон бүтээн байгуулалтын ажлыг удирдаж байсныг энэ үеэр дурсгалын самбарын нээлтэд оролцогчид дурсч байлаа. Хэдийгээр түүний хувьд одоогоос хоёр жилийн өмнө хүний орчлонгоос халин одсон ч түүний байгуулсан гавьяа, суу алдрыг нь монголчууд тэр дундаа Эрдэнэтчүүд мартах учиргүй ажээ. [sgmb id="1"]