Аймгийн Засаг даргын шинэ оны, анхны шуурхай хуралдаан ихээхэн ажил хэрэгч боллоо. Энэ удаад уламжлал ёсоор аймгийн Засаг дарга Д.Батлут өөрийн өгсөн үүрэг даалгаврын биелэлтийг нэгбүрчлэн тодруулж, зарим үед нэмэлт тайлбар авч шийдвэрлэгдсэн асуудлыг нь илүүтэй сонирхсон. Тухайлбал, иргэдийн зүгээс гэр хорооллын шөнийн гэрэлтүүлэг 01.00 цагт унтарчих юм. Шөнийн ээлжтэй хүмүүс явахад хүндрэлтэй байна. Үүнийг удаан хугацаагаар асааж өгч болдоггүй юм уу гэсэн хүсэлт гаргажээ. Үүнийг Засаг даргын зүгээс сонирхож “Шөнийн цагаар харанхуй гудамжийг гэрэлтүүлэхээр гэрэл тавьсан юм байгаа биз дээ. Энэ асуудлыг тун яаралтай шийдэж 02.00 цаг хүртэл асаадаг болго. “Эрдэнэт ус” компанийн Д.Бүүвэйбаатар дарга шийдэж болох саналаа боловсруулаад орж ир” хэмээх үүргийг газар дээр нь өглөө.              Мөн Баян-Өндөр сумын Засаг даргаас шуурхай дээр хийсэн мэдээллийн үеэр ил талбайд худалдаа эрхлэгчдийн асуудал, их хэмжээний хөрөнгө мөнгө зарсан Худалдааны гудамжийг “эргэлтэд оруулах” чиглэлээр хийж буй ажлыг аймгийн Засаг дарга сонирхож байлаа. “Хаана эрэлт байна, тэнд нийлүүлэлт явдаг зарчмын дагуу хүн ихтэй газар худалдаа байдаг. Гар дээрээс худалдаа эрхлэгчид хүний хөл хөдөлгөөнтэй газарт цуглардаг. Энэ талыг нь харж Худалдааны гудамжныхаа менежментийг боловсруулах хэрэгтэй. Түүнээс биш гар дээрээс наймаа эрхлэгчдийг Худалдааны гудамж руу оч гэж хөөж тууснаар асуудал шийдэгдэхгүй. Энэ тал дээр нь анхаарч ажиллах хэрэгтэй” хэмээн аймгийн Засаг дарга үүрэг өглөө. Ингээд энэ оны анхны үуурхайн зарим онцлог мэдээллийг хүргэж байна. [sgmb id="1"]