Байгаль орчны газрын даргын үүргийг түр орлон гүйцэтгэгч С.Жаргалсайхан аймгийн Засаг даргын шуурхай хуралдаан дээр нэгэн мэдээлэл хийлээ. Түүний яриагаар Эрдэнэт хотод агаарын бохирдол, утаа буурсан гэнэ. Эрдэнэтийн утаа удахгүй Улаанбаатарын дараа орох хэмжээнд хүрээд буйг хүн бүхэн ярьж байгаа ч эрхэм дарга тэс өөр зүйл ярьсан нь анхаарал татлаа. [embed]http://www.erdenetnews.mn/wp-content/uploads/video/2017-01-17-Jargalsaikhan-utaa.mp4[/embed] Орон нутгаас агаарын бохирдлыг бууруулахаар утаагүй зуух олгох ажлыг сүүлийн хэдэн жил хийсэн. Өнгөрсөн онд иргэдэд олгох ёстой утаагүй зуухаа өгөөд дуусчихсан. Бүх зуухаа тараагаад айл өрхүүддээ өгсөн. Үүний хүчинд утаа, агаарын бохирдол буурсан. Харин энэ онд аймгийн төсөвт ч, Байгаль орчны яамнаас ч утаагүй зууханд хөрөнгө төсөвлөөгүй гэж С.Жаргалсайхан дарга ярьлаа. [embed]http://www.erdenetnews.mn/wp-content/uploads/video/2017-01-17-Jargalsaikhan.mp4[/embed] Гэтэл өнөөдөр манай аймагт төрийн ажлын уялдаа холбоо муу, дор бүрнээ том ажил хийж буй хүмүүсийн дүр зураг харагддаг ч амьдрал дээр үүнээс өөр зүйл өрнөж байна. С.Жаргалсайхан даргыг “2016 оны төсөвлөгдсөн утаагүй зуухаа тараасан. Асуудал байхгүй, утаа багаслаа” гэж мэдэгдсэнийг хараад захиалсан зуухаа авах гэсэн иргэд хэвлэл мэдээллийнхэнд хандаж байна. Их залуу багийн иргэн Ж.Галбадрах “Аймгийн дарга нар утаагүй зуухаа тараачихсан гэж телевизээр яриад байна. Би 2016 оны арванхоёрдугаар сарын 10-нд Голомт банкинд утаагүй зуух авах гэж 118 мянган төгрөг тушаасан ч одоо хүртэл зуухаа аваагүй байна. [embed]http://www.erdenetnews.mn/wp-content/uploads/video/2017-01-17-Galbadrah.mp4[/embed] Энэ талаар Их залуу багийн Засаг дарга С.Төмөрбаатараас тодруулахад “Манай багийн хэмжээнд 2016 онд утаагүй зуух авахаар мөнгөө төлж гэрээгээ хийсэн 120 гаруй хүн өнөөдрийг болтол зуухаа аваагүй байгаа. Утаагүй зуух нийлүүлэх компани нь утсаа авахгүй, утсаа салгаад алга болчихсон. Би энэ талаар сумын Засаг даргын орлогчид мэдээлсэн. Тодорхой арга хэмжээ авна гэдэг хариу өгсөн. Иргэд 2016 онд мөнгөө төлөөд захиалсан утаагүй зуухаа аваагүй байгаа” гэлээ. [embed]http://www.erdenetnews.mn/wp-content/uploads/video/2017-01-17-Tumurbaatar.mp4[/embed] Их залуу багийн иргэн Ж.Галбадрах гэрээнээс харвал гэр хорооллын иргэдэд утаагүй зуух нийлүүлэх гэрээг “Рояал өүшн” гэдэг компани хийжээ. С.Төмөрбаатар даргын хэлснээр энэ компани 120 гаруй иргэний зуухны урьдчилгаа мөнгө болох 14 орчим сая төгрөгийг аваад одоо болтол сураггүй байгааг манай том дарга нар олж мэдээгүй, дуулаагүй гэхэд итгэх хүн олдох уу. Байгаль орчны газрын дарга С.Жаргалсайхан цэнхэр дэлгэцээр “Утаа багасч байгаа, утаагүй зуухаа тараагаад дуусчихсан” хэмээн мэдэгдэж байх хойгуур иргэд нь утаагүй зуухаа нүдээ хөхөртөл хүлээж байгааг аймаг, орон нутгийн удирдлагууд мэддэг болов уу.  [sgmb id="1"]