Аймгийн Цагдаагийн газрын дэргэдэх Эрүүлжүүлэх, баривчлах байрны хяналтын камерыг 2007 онд суурилуулсан. Одоогийн байдлаар уг камер эвдэрснээс дуу, дүрсний шаардлага хангахгүй болжээ. Согтуу иргэд хоорондоо маргалдаж зодолдох үед камерын бичлэгийг үзэх, нотлох баримт бүрдүүлэх боломжгүй юм. Цагдаагийн газраас камераа солих талаар холбогдох удирдлагуудад шаардлага хүргүүлдэг боловч одоог хүртэл шийдэж өгөөгүй гэнэ. Мөн Эрүүлжүүлэх, баривчлах байрны эрүүл ахуй муу, олон хүнийг нэг өрөөнд байлгадаг. Уг байранд өдөрт дунджаар 20-30 хүн ирдэг. Үүний зэрэгцээ байнгын саатуулдаг хүмүүстэй нийлээд 50 орчим хүнтэй хоёр цагдаагийн алба хаагч, нэг эмч ажилладаг. Нэг өрөөнд 12-14 хүнийг саатуулж байна. Энэ мэт олноороо байх нь нэг хүнд ногдох талбайн хүртээмж, амьсгалах агаар багасч байгаа юм. Эрүүлжүүлэх, Баривчлах байрны дарга, цагдаагийн хошууч Ц.Болд “Цагдаагийн алба хаагч хүний амь нас, эрүүл мэндийг хамгаалах үүрэгтэй ажилладаг. Саатуулах байранд гэмт хэрэг гарвал камерын хяналт муугаас шалтгаалан иргэд хохирч болзошгүй байна” гэлээ. Эрүүлжүүлэх, баривчлах байрны камер эвдэрсэн, өрөөний багтаамж муу байгаа зэрэг нь хүний эрхийг зөрчсөн үйлдэл болох талтай. Ц.Ариунчимэг [sgmb id="1"]