“Орхон АЗЗАН” ТӨҮГ гэж нам гүм хэрнээ дарга нар нь далайцтайхан шиг “хөлждөг” нэг байгууллага Орхон аймагт бий. Аймгийн зам засварын компани гэсэн үг л дээ. Тус байгууллагын даргаар аймгийн МоАХ-ны дарга Б.Эрдэнэцогт томилогдоод удаагүй байгаа. Б.Эрдэнэцогтын хувьд албан тушаалын шатаар огцомхон өгсөж яваа АН-ын залуу боловсон хүчин. Тэрбээр өнгөрсөн өвөл Орхон аймгийн МоАХ-ны даргаар томилогдсон. Тун удалгүй “Орхон АЗЗАН” ТӨҮГ-ийн захирлын зөөлөн сэнтий дээр тухалсан. Өнгөрсөн оны намар цаг бүр тодруулбал, есдүгээр сарын эхээр аймгийн Аудитын газарт иргэний ирүүлсэн өргөдлийн дагуу “Орхон АЗЗАН” ТӨҮГ-т аудитын шалгалт хийсэн байдаг. Шалгалтаар багагүй зөрчил дутагдал илэрснийг тухайн үеийн “Орхон АЗЗАН”-ы дарга байсан Б.Цогтгэрэл үүнийг эрс үгүйсгэж байсан юм. Б.Цогтгэрэл “Миний ажил албан тушаалыг улс төрийн шалтгаанаар авах гэж АН-ын одоогийн удирдлага улайрч байгаа. Намайг ямар нэг аргаар зайлуулахын тулд манай ажилд аудитын шалгалт оруулж, улмаар эхнэрийн минь нэр дээр байдаг “Өлзий хутагийн наран” хувийн компанийг нь хүртэл шалгуулж улстөржиж улайрч байна” хэмээн мэдэгдэж байсан нь сонины хуудаснаа шарлан үлджээ. Үнэхээр ч үүнийг батлах гэсэн мэт Б.Цогтгэрэл удалгүй суудлаасаа бууж, аймгийн удирдлагууд Орхон аймгийн МоАХ-ны дарга Б.Эрдэнэцогтыг “Орхон АЗЗАН” ТӨҮГ-ын даргаар томилсон билээ. Азтай юу, од нь гийсэн үү, намын залуу дарга өөрөө албан тушаалд очоод сэтгэл нь ханаагүй бололтой. Эхнэрээ Ш.Отгонбилэгийн нэрэмжит Технологийн сургуулийн Хүний нөөцийн хэлтсийн даргаар томилуулжээ. АН-ынхан төрийн алба, аль л цалин өндөр албан тушаалд гишүүдээ гэр бүлээр нь суулгадаг тогтолцоо Эрдэнэтэд газар аваад байгаагийн нэг жишээ Б.Эрдэнэцогтын гэр бүлээр дуусаагүй. Энэ үргэлжлэл “Эрдэнэт үйлдвэр”-т газар авсан тухай эх сурвалжууд ярьж байна. Албан тушаал, эрх мэдлийг гэр бүлээрээ эзэгнэдэг тогтолцоо Ардчиллын үндсэн зарчимд нийцэхгүй гэдгийг ард иргэд харж, дүгнэлт хийж байгаа биз ээ. Л.Гэрэл