Аймгийн Засаг даргын зөвлөлийн хурлаар “Аймгийн нутаг дэвсгэрт согтууруулах ундаа худалдах, түүгээр үйлчлэх тусгай зөвшөөрөл олгох, хяналт тавих журмын хэрэгжилтийн явц, цаашид авах арга хэмжээний тухай” асуудлыг авч хэлэлцсэн. Өнөөдрийн байдлаар аймгийн хэмжээнд архи, согтууруулах ундаагаар үйлчилдэг 452 цэг байна. Аймгийн ЗДТГ-аас “Согтууруулах ундаа худалдах, түүгээр үйлчлүүлэх журам”-ыг шинэчлэн боловсруулахаар ажиллаж байгаа. Үүний хүрээнд аймаг, орон нутагт амь бөхтэй оршиж байгаа “Шагчид”, “Шаг зардаг хүмүүс” гэдэг ойлголтыг арилгах, ахуйн хүрээнд үйлдэгдэж байгаа гэмт хэргийг бууруулахын тулд архи, согтууруулах ундааны талаар баримталж байгаа бодлогоо эргэн харахаар шийджээ. Шөнийн 00 цаг болж дэлгүүр, баар, ресторанууд хаалгаа хаахтай зэрэгцэн Урт цагааны гудамжинд шагчдын ажил эхэлдэг. Аймгийн Цагдаагийн газрын судалгаагаар энд 15-20 жил архи шагласан хүн ч бий гэнэ. Энэ мэргэжлээ үр хүүхэддээ өвлүүлдэг, уламжлуулан ажиллуулах явдал байгаа гэдгийг мэргэжлийн байгууллагынхан ярьж байна. Аймгийн Цагдаагийн газраас архидалтын эсрэг олон ажил хийдэг ч зарим нэг хууль тогтоомж чөдөр тушаа болдог аж. Тухайлбал, 00 цагаас хойш архи, согтууруулах ундаагаар үйлчилсэн аж ахуйн нэгжийг Захиргааны хариуцлагын тухай хуулийн дагуу 1500-8000 төгрөгөөр л торгодог. 8000 төгрөгөөр торгуулсан ч маргааш нь үйлдлээ давтдаг аж ахуйн нэгж байна хэмээн цагдаагийнхан учир байдлаа тоочсон. Тэгвэл үүнд аймгийн ЗДТГ-ын дарга Д.Соёлчхүү арай өөр байр сууринаас хандсаныг хүргэж байна. [embed]http://www.erdenetnews.mn/wp-content/uploads/video/2017-02-13-Soyolchkhuu.mp4[/embed]  [sgmb id="1"]