Улс даяар Элсэлтийн ерөнхий шалгалт явагдаж байна. Өнөөдөр гурав дахь өдөр, математикийн шалгалтанд хамгийн олон буюу ихэнх төгсөгчид оржээ. Шалгалтын үеэр хүүхдүүд ямар зөрчил гаргаж байгаа талаар Боловсролын газрын мэргэжилтэн Б.Мөнхзулаас тодрууллаа. -Өнөөдөр ЭЕШ-ын математикийн шалгалт авч байна. Шалгалтанд хэдэн хүүхэд оров? Монгол хэлний шалгалтнаас хоцорсон хүүхдүүд дахин өгөх боломж байгаа юу? -Энэ жилийн 11-р анги төгсөж байгаа бүх хүүхэд математикийн шалгалтанд орж байгаа гэсэн үг. Монгол хэл бичгийн шалгалтыг сая 14-нд улс даяар авсан. Монгол хэл бичгийн шалгалтыг хүүхэд бүр заавал өгсөн байх ёстой. Шалгалт өгөөгүй хүүхэд дараагийн шалгалтандаа орох эрхгүй гэж журманд заасан байсан. Энэ жилийн хувьд монгол хэл бичгийн шалгалтыг бүх хүүхэд анх удаа өгсөн учир улсын хэмжээнд энэ шалгалтанд ороогүй хүүхэд олон байсан. Ийм учраас яамнаас шалгалтанд ороогүй хүүхдүүдийг дахин оруулахаар журам гаргасан байгаа. Манай аймагт гэхэд зургаан хүүхэд шалгалтнаас хоцорсон. Эдгээр хүүхдүүдийг шалгалтанд орсон гэсэн стикерийг бүртгэлийн хуудсан дээр нь наагаад, шалгалтанд оруулсан. Хэрэв тухайн хүүхэд монгол хэл бичгийн шалгалтаа өгөөгүй бол бусад арван шалгалтанд орохгүй, их, дээд сургуульд элсэн суралцах нь бүтэн жилээр хойшилно гэсэн үг. Анх удаа монгол хэл бичгийн шалгалт авч байгаа учир хүүхдүүдийн ирээдүйн амьдралыг бодож, уян хатан хандаж байна. -Дараагийн жилээс монгол хэл бичгийн шалгалтыг дүнтэй болгож, хэрэгжүүлж байгаа журмаа мөрдөнө гэсэн үг үү? Шалгалтын үеэр гарч байгаа зөрчил дээр ямар байр суурьтай байна вэ? -Ирэх хичээлийн жилээс монгол хэл бичгийн шалгалт өгөөгүй, хоцорсон сурагч дараагийн шалгалтанд орох эрхгүй болно. Мөн дүнтэй болж, бусад хичээлүүдтэйгээ хавсраад бүлэг болоод явна. Одоогийн явагдаж байгаа шалгалтын үеэр хүүхдүүдийн гар утас, таблет зэргийг нь хураан аваад шалгалтанд нь оруулж байна. Эцэг эхчүүдэд хандаж хэлэхэд, мэдсээр байж хүүхдүүд хоёр утастай орж ирчихээд үүдэн дээр нэг утсаа хураалгаад ордог. Хянагч багш нар дотор ажиллаж байгаа. Тэд бас хураан авч байна. Давхар давхар хурааж аваад, аль болохоор зөрчилгүй явуулж байна. Зөрчил гаргасан хүүхдэд гурван удаа сануулга өгөөд, шалгалтнаас хөөнө. Ийм тохиолдол нэг хүүхэд дээр гарсан. Гурван утас хураалгасан учир шалгалтнаас хөөх өргөдөл өгчихсөн байгаа. Эхний шалгалтан дээр гар утас хураалгаад, сануулга аваад орсон. Гэтэл дараагийн шалгалтанд дахин гар утас авч орсон. Гурван удаа гар утас хэрэглэхээр оролдсон. Хүүхдүүд арван жил сурсанаа шударгаар шалгуулах гэж байна. Буруу арга хэрэглэх гэж дахин дахин орж ирээд байгаад эцэг эхчүүд анхаарах хэрэгтэй байна. Б.Рэнцэнханд