УИХ-ын сонгуулийн 46-р тойргоос сонгогдсон эрхэм гишүүн О.Содбилэг энэ сарын 16-ны 18.00 цагт “Уурхайчин” соёлын ордны их танхимд сонгогчидтойгоо уулзахаар товлосон. Сонгууль болсноос хойш найман сар өнгөрөөд байхад иргэд, сонгогчидтойгоо уулзаж амжаагүй гишүүнийхээ үгийг сонсох гэсэн иргэд цагтаа цугласан ч уулзалт 40 минутын дараа буюу 18.40 цагт эхэлсэн юм. УИХ-ын гишүүн О.Содбилэгийн сонгогчидтойгоо хийх уулзалтад аймгийн Засаг дарга Д.Батлут, ИТХ-ын дарга П.Пүрэвлхагва, УИХ-ын гишүүн, Засгийн газрын гишүүн, Хөдөлмөр, нийгмийн хамгааллын сайд Н.Номтойбаяр, Увс аймгаас сонгогдсон УИХ-ын гишүүн Н.Цэрэнбат, Ерөнхий сайдын улс төр, эдийн засгийн бодлогын зөвлөх Н.Төмөрхүү болон албаны хүмүүс оролцсон юм.    УИХ-ын эрхэм гишүүн О.Содбилэгийн уулзалтыг аймгийн Засаг дарга Д.Батлут хөтлөн явуулсан. О.Содбилэг гишүүн сонгогчидтойгоо уулзаж өнгөрсөн найман сарын хугацаанд хийсэн ажлынхаа товч тайланг тавьсан. “Би УИХ-ын дарга, МАН-ын дарга М.Энхболд, Ерөнхий сайд Ж.Эрдэнэбат нарын тусгай даалгавраар гадаадад олон хоног ажилласан. 2016 оны долдугаар сараас өмнө Засгийн эрх барьж байсан нөхдүүд дэндүү хариуцлагагүй ажилласан. Тэдний хариуцлагагүй улстөржилтөөс болж улсын эдийн засаг хямарч гадны хөрөнгө оруулалт зогссон. Одоогийн УИХ, Засгийн газар сүүлийн жилүүдэд гарсан бодлогын алдааг залруулахад гол анхаарлаа хандуулан ажилласан. Энэ ажлын нэг нь гадаадын хөрөнгө оруулагчдын итгэлийг татах, эдийн засгийг сайжруулах чиглэлд төсөл хөтөлбөр боловсруулах чиглэлээр ажиллаж байна. Хамгийн сүүлд гэхэд Ерөнхий сайдын даалгавраар энд сууж байгаа Ерөнхий сайдын зөвлөх Н.Төмөрхүүгийн хамтаар нэг тэрбум ам.долларын төсөл гаднаас босгох ажил хөөцөлдсөн. 2017 оны хувьд Монгол улсын төсөв, эдийн засаг хүнд байна. Гэхдээ ямар ч байсан эхний хоёр сарын байдлаар татварын орлогын төлөвлөгөө давж биелэсэн. Үүнд зэсийн үнийн өсөлтөөс эхлээд УИХ, Засгийн газраас хэрэгжүүлж байгаа бодлого, арга хэмжээ зохих нөлөөгөө өгсөн. 2017 оны эцсээр улсын төсөв, хөрөнгө сайжрах төлөв харагдаж байгаа. Төсөв, эдийн засаг сайжраад ирвэл УИХ, Засгийн газрын зүгээс иргэдийнхээ эрүүл мэнд, боловсролын чиглэлд анхаарлаа хандуулж дээрх салбаруудад хандсан олон ажил хийхээр төлөвлөж байна. Миний бие УИХ-ын гишүүн Н.Номтойбаяртай хамтраад 2015 онд ахмад настанд Ач санах тухай хуулийн төслийг хамтран санаачлан УИХ-ын даргад өргөн бариад байсан. Гэтэл УИХ-ын дарга, АН-ын дарга З.Энхболд МАН-ын залуу гишүүд ахмад настнууддаа хайр зарлаад гүйх боллоо. Ачийг нь хариулна гэсэн юм яриад байна. Хэдийдээ ахмадууддаа хайртай болчихов гэж хэлээд бидний өргөн барьсан төслийг дарсан” гэлээ. [sgmb id="1"]