УИХ-ын эрхэм гишүүн О.Содбилэг уулзалтынхаа төгсгөлд иргэдийн сонирхсон асуултад харилт өгсөн. Мөн Засгийн газрын гишүүн Хөдөлмөр, нийгмийн хамгааллын сайд Н.Номтойбаяраас иргэд тэтгэвэр тэтгэмж, нийгмийн даатгал, эрүүл мэндийн үйлчилгээ зэрэг нийгэмд тулгамдсан асуулт асууж хариулт авсан юм. Тухайлбал, Говил багийн иргэн Даш: -Содбилэг гишүүн ээ, та сонгогдсон тойрогтоо ойр ойрхон ирж ажиллаж бай. Ирж бай, ирж бай”. Говил багийн иргэн Дорж: “УИХ, Засгийн газрын үйл ажиллагааг хараад байхад хуучин тогтолцоо руугаа орох гээд байгаа юм шиг санагдсан. Гэхдээ үүнд буруу байхгүй. Энэ бол зөв. Өнөөдөр хариуцлага алга байгаа учраас тэр. Дээр нь төрийн мэдлийн томоохон үйлдвэрүүд бариад ард түмнээ тэгш, хүртээмжтэй хангаад өгөөч.” -Говил багийн иргэн Амарсанаа: -Содбилэг гишүүн ээ, та намайг сайн санахгүй байж мэднэ. Би Говил багийн иргэн Амарсанаа байна. Эрдэнэтийнхэн намайг мэднэ. Би үүргийн худалдаагаар ном зардаг. Одоогоос нэлээн хэдэн жилийн өмнө 2012 оны сонгуулиар таныг сурталчилгаа хийж байх үед би Донровын Намдагийг цоо шинэ цуврал гурван ботийг таньд үзүүлж байсан. Та худалдаж авъя гээд одоо би таньд мөнгө өгч болохгүй, хууль зөрчинө. Сонгуулийн дараа би таны номны мөнгийг өгнө гэж хэлээд миний гурван номыг аваад явсан. Туслах чинь надаас тэр гурван номыг минь авсан. Түүнээс хойш би мөнгөө авч чадахгүй өдий хүрлээ. 2016 оны сонгуулиар таньтай уулзах гэтэл таны бие хамгаалагчид ойртуулаагүй шүү. Би өнөөдөр таныг ирсэн гэж дуулаад номныхоо мөнгийг авах гэж гурван хүүхдээ гэрт нь цоожлоод ирлээ. Номныхоо мөнгийг л авмаар байна. Би ном зардаг ажил хийдэг. Мөнгөө авъя -Баян-Өндөр сумын иргэн, ахмад багш Сумъяа: -Та бүхэн нэг асуудалд анхаарлаа хандуулж өгөөч. Өнөөдөр нэгдүгээр ангийн хүүхэд өдөр бүр 8 кг ачаа бүхий цүнх үүрч хичээлдээ явж байна. Тэд яагаад ийм хүнд ачаа үүрэх ёстой юм бэ. Насанд хүрсэн иргэнийг өдрийн турш 5 кг төмс бариад яваад бай гэвэл чадахгүй гэнэ. Гэтэл хүүхдүүд ийм хүнд ачаа үүрч байна. Ном нь яасан зузаан, хүнд юм бэ. Сурах бичгийг нь ангид нь байлгаж болдоггүй юм уу. Энэ бүхэн хүүхдийн өсөлт хөгжилтөд саад болж нурууны гажигтай, хазгай муруй нуруутай болно. Үүнийг анхаарч өгөөч. Дээр нь хүүхдийн хувцасыг чөлөөтэй сонгож болохгүй юм уу. Өсөлт хөгжилтөд нь одоогийн хичээлийн хувцас саад болж байна гэлээ. [sgmb id="1"]