Орхон аймагт олон жил хийсэн ч дуусаагүй байгаа Азийн хөгжлийн банкны санхүүжилттэй “МОН-2301” төслийг үргэлжлүүлэхээр орон нутгийн төсвөөс энэ онд 300 сая төгрөг нэмж тусгасан байна. Дээрх хөрөнгөөр Баянбулаг, Булаг, Рашаант, Уртын нол, Наран багуудын айл өрхийн цэвэр, бохир усыг инженерийн шугам сүлжээнд холбохоор төлөвлөжээ. Гэсэн ч таван багт 300 сая төгрөг хүрэлцэхгүй учир эхний ээлжинд гурван багийг түрүүлж холбохоор шийдвэрлэсэн байна. Тухайлбал, Рашаант, Уртын гол, Наран багууд дээр хийсэн “МОН-2301” төслийн ажлыг үргэлжлүүлэн цэвэр, бохир усанд холбохоор болжээ. “Гэр хорооллын айл өрхүүд инженерийн шугам сүлжээнд холбогдсноор цэвэр, бохир усны асуудлаа шийдвэрлэж, орон сууцны айл өрхтэй адил амьдралын чанар нь дээшилнэ. Аймгийн Барилга захиалагчийн албанаас дээрх ажлын зураг төсвийг ирэх сард багтаан дуусгаж хүлээн авна. Ингэснээр тавдугаар сард гүйцэтгэх компанийн тендерийг зардаж, зургаадугаар сараас ажлыг эхлүүлнэ” гэж Хотын захирагчийн албаны мэргэжилтэн П.Болор ярьлаа. Азийн хөгжлийн банкны санхүүжилтээр хэрэгжиж байгаа “МОН-2301” төслийн хүрээнд цэвэр усны шугам, өргөлтийн насосны станц, бохир усны 5,7 км шугам, усан сан барьсан. Төслийг үргэлжлүүлэхэд орон нутгийн төсвөөс 5,4 тэрбум төгрөгийг өнгөрсөн хугацаанд зарцуулжээ. Мөн төслийн хүрээнд гэр хорооллын орон байрны нөхцөлийг сайжруулах зорилгоор Төрийн банк, Капитал банкаар дамжин зээл олгосон. Дээрх хоёр банк 2 тэрбум төгрөгийн зээлийг 246 айл өрхөд өгсөн байна. Зээл авсан иргэдээс ердөө таван айл инженерийн шугам сүлжээнд холбогдоход зээлийг зориулсан байна. Харин энэ онд баталсан 300 сая төгрөгөөр эхний ээлжинд Рашаант, Наран, Уртын гол багийн айл өрхийг цэвэр, бохир усанд холбохоор болсон байна. [sgmb id="1"]