Улаанбаатарт хотод хүүхдийг гудамжинд явж байхад нь мансууруулан хулгайлахыг завдсан үйлдэл гарсныг интернэтийн мэдээллээр хүмүүс олон нийтэд мэдээлжээ. Уг үйлдлийг өмнө нь багшаар ажиллаж байсан нэгэн хийснийг цагдаагийн байгууллага тогтоож, мөрдөн шалгаж байгаа юм. Дээрхтэй адил хүүхэд хулгайлах гэмт хэрэг Орхон аймагт гарахгүй гэх баталгаагүй. Иймд холбогдох байгууллагууд анхааралдаа авахыг аймгийн Засаг дарга Д.Батлут шуурхай зөвлөгөөний үеэр онцолсон. Боловсролын байгууллага, эцэг эхчүүд, цагдаагийн байгууллага хүүхдийг гэмт хэргийн золиос болох үзэгдлээс хамгаалахын тулд хамтран ажиллахыг цаг үе харуулж байна. Хүүхдийн байгууллагууд цэцэрлэгийн насны болон бага насны хүүхдийг эцэг эхээс нь хүлээн авч, хүлээлгэн өгдөг байх. Гудамж талбайд хүүхдийг ганцааранг нь явуулахгүй байх зэрэгт боловсролын байгууллагууд анхаарах цаг болжээ гэдгийг аймгийн Шуурхай зөвлөгөөний үеэр ярьлаа. Өмнө нь хүүхдээ цэцэрлэгийн багшид хүлээлгэн өгөлгүй, ангийнх нь үүдэнд орхиж явсанаас хүүхэд ээжийнхээ араас гарч, гудамжаар тэнэж төөрсөн тохиолдол манай аймагт гарч байсан. Мөн замын хөдөлгөөний аюулгүй байдлын эсрэг гэмт хэрэг, хүүхэд хулгайлах, хулгай, дээрмийн хэргийн золиос болох тохиолдол хүүхдэд тохиолддог учир энэ төрлийн гэмт хэргээс хэрхэн сэргийлж ажиллаж байгаа талаар аймгийн Цагдаагийн газраас тодруулсан юм. Гэсэн ч аймгийн Цагдаагийн газар хүүхдийг хамгаалах талаар эхлүүлсэн ажил одоогоор байхгүй байна. [sgmb id="1"]