Төрийн банкнаас багш, эмч нарын цалингийн зээлийн хүүг бууруулж, шимтгэлийг тэглэх шийдвэр гаргалаа. Үүнийг сонссон иргэдийн хувьд “Монголд багш, эмч нар л хүн юм уу”, “Ардын намд багш, эмч нар Ерөнхийлөгчийн сонгуулийн өмнө хэрэг болжээ” гэх зэргээр цахим орчинд сэтгэгдлээ илэрхийлж байна. Эндээс харвал манай улсад эмч, багш нараас бусад нь хүн биш болж таарлаа. Өнөөх Үндсэн хуульд заасан хүний эрх, тэгш эрх, эдлэх эрх гээд байдаг үнэт зүйл эмч, багш, төрийн албан хаагчдад хүртээлтэй. Бусдад нь бол билэгдлийн шинж чанартай болжээ гэхэд нэг их буруудахгүй. Төрийн банкийг МАНАН бүлэглэл байгуулсан. Тэд Засгийн эрх авангуутаа энэ банкны удирдлагад өөрийн төлөөллийг суулгаж тэднээр дамжуулан массыг татахын тулд есөн шидийн ажил санаачилдаг. Багш, эмч нарын цалингийн зээлийн хүүг бууруулж, шимтгэлийг нь тэглэх шийдвэрийг Засгийн газар, Сангийн яам, Төрийн банк хамтран гаргалаа. Жил гаруйн өмнө “банкны зээлийн шимтгэл авдаг тогтолцоо нь буруу” хэмээн нэг хэсэг шуугисан даа. Банкиуд ажил хийж зээл гаргаж өгснийхөө төлөө зээлдэгчээс шимтгэл авна, авах ёстой хэмээн мэтгэж эцэст нь тэд ялагч болсон. Тэдний дунд Төрийн банк ч чадлынхаа хэрээр хашхирч байлаа. Гэтэл МАНАН-гийн үргэлжлэл МАН-ын Засгийн газраас Төрийн банктай хамтраад багш, эмч нарын зээлийн хүүг бууруулаад, дээр нь шимтгэлийг нь тэглэх шийдвэр гаргаж байгаа нь бусад банкууд шимтгэл авдаг нь хууль зөрчсөн үйлдэл гэдгийг хүлээн зөвшөөрч буй хэрэг бус уу. За яахав, зээлийн хүүг нь бууруулж болдог байж. Тэгвэл өнөөх “Шимтгэл” гээчийг нь тэгээд хэн төлөх болж байна вэ. Багш, эмч нар янцаглахыг нь хийж хувийн хэшлийнхэн шимтгэл төлөх үүргийг нь хүлээх нь л дээ. Засгийн газар Төрийн банкнаас зээл авсан багш, эмч нарын цалингийн зээлийн хүүг бууруулах шийдвэр гаргаж байгаа нь эрх баригч МАН-ын хувьд Ерөнхийлөгчийн сонгуулиар тэдний саналыг худалдан авах гэсэн ядмагхан арга гэхээс өөр хэлэх үг алга. Арай л “өмнө авсан шимтгэлийн хүүг нь буцаан олгоно” гэж хашхиралгүй амаа хамхилаа. Төрийн банкнаас жилдээ 48.2 тэрбум төгрөгийн цалингийн зээлийг ойролцоогоор 8316 багш, эмч, ажилтан авдаг байна. Тэд жилдээ 1-1.6 тэрбум төгрөгийн хүү, шимтгэлийн зардлаас чөлөөлөгдөх урьдчилсан тооцоо гаргажээ. Үндэсний статистикийн хорооноос сүүлийн зургаан жилд Монголын нийт өрхийн нийгэм, эдийн засгийн байдал хэрхэн өөрчлөгдсөн тухай судалсан байдаг. Тус судалгаагаар нийт өрхийн 45.7 хувь нь цалингийн зээлтэй болох нь тогтоогдсон аж. Нэг өрх хэд хэдэн зээлтэй буюу давхар зээлтэй тохиолдол ч байсан гэнэ. Нэг үгээр бол, нэг гэр бүлийн хоёр цалингийн зээлтэй байх, нэг гэрийн ахмадууд хоёулаа тэтгэврийн зээлд хамрагдсан гэх мэтчилэн баримтууд гарчээ. Монгол Улсын нэг өрхөд банк, банк бус санхүүгийн байгууллагын зээлтэй дор хаяж хоёр хүн байгаа нь тодорхой.Тэдний хувьд багш, эмч нар л биш бол өнөөгийн Монголын төрд хамаагүй бололтой. Үндсэн хуулинд “Мал сүрэг төрийн хамгаалалтанд байна” хэмээн заасан атлаа засаг, төр нь Монгол хүнээ хамгаалах тал дээр амаа ч ангайхгүй байж иргэдийг эзэмшсэн мэргэжил, мэдлэг боловсрол, нийгмийн гарлаар нь ялгаварлан гадуурхсан нь энэ цагийн өнгө яавч биш баймаар. [sgmb id="1"]