Манай аймагт “Итгэлийн зээл” олгох санхүүгийн эх үүсвэрийг баталгаажуулсан гэрээнд Хөдөлмөр нийгмийн хамгааллын сайд Н.Номтойбаяр, Засг дарга Д.Батлут нар гарын үсэг зурж байсан. Ингэснээр 1.4 тэрбум орчим төгрөгийг банкны шалгуурыг хангах боломжгүй, барьцаа хөрөнгөгүй иргэдэд зээл олгоход зарцуулах нөхцөл бүрдсэн. “Итгэлийн зээл”-д хамрагдах хүсэлтэй иргэдийн анкетийг багууд дээр авч эхлээд байна. Өрхийн жижиг бизнес, жижиг дунд үйлдвэр эрхлэгч аж ахуйн нэгжүүдэд бизнесээ эргэлдүүлэх мөнгө байхгүй учраас хөнгөлөлттэй нөхцөлтэй зээлээр бизнес эрхлэгчдийг хүртээмжтэй хангах шаардлагатай. Үүнийг шийдэх зам нь санхүүжилтийн асуудал байдаг. Иргэд тодорхой нөхцөлийн дагуу заасан хугацаанд зээлийг 100 хувь эргэн төлөх ёстой. Дээрх “Итгэлийн зээл”-ээс гадна Хөдөлмөр эрхлэлтийг дэмжих төсөл хөтөлбөрийн хүрээнд манай аймагт зургаан төсөл хөтөлбөр хэрэгжихээр болсон. Үүний таван хөтөлбөр нь буюу “Ажлын байрыг дэмжих хөтөлбөр”, “Хөгжлийн бэрхшээлтэй иргэдийг дэмжих”, “Малчдын хөдөлмөр эрхлэлтийг дэмжих”, “Залуучуудын хөдөлмөр эрхлэлт буюу гарааны бизнесийг дэмжих”, “Ахмад мэргэжилтэний зөвлөх үйлчилгээг дэмжих” зэрэг хөтөлбөрт эргэн төлөгдөх нөхцөлтэй санхүүгийн дэмжлэгийн үйлчилгээ олгох юм. Тодруулбал, иргэнд 3 хүртэлх сая төгрөгийн санхүүгийн дэмжлэг үзүүлнэ. Уг дэмжлэг нь итгэлцлийн үндсэн дээр хүүгүй, барьцаагүй өрхийн бизнес эрхэлж буй иргэдэд олгох зээл юм. Дээрх таван төсөл хөтөлбөрийн хүрээнд нийт 344 сая төгрөгийг иргэдэд олгохоор төсөвлөсөн байна. “Хөгжлийн бэрхшээлтэй иргэний ажлын байрыг дэмжих хөтөлбөр”-ийн хувьд аж ахуйн нэгж, бичил бизнес, үйлдвэрлэл эрхэлж буй хөгжлийн бэрхшээлтэй иргэн, байнгын асаргаанд байдаг хүүхдээ асарч буй эцэг эх, хувиараа хөдөлмөр эрхлэгч нар дээрх зээлийг 48 сарын дотор 100 хувь эргэн төлөх нөхцөлтэй 3 хүртэлх сая төгрөгийг авах боломжтой. Зээл авах хүсэлтэй иргэд харьяа багийн Ажлын албандаа тавдугаар сарын 3-ны дотор хандах хугацаатай юм байна. Б.Чимэдлхам [sgmb id="1"]