Олон улсын эв санааны нэгдлийн өдрөөр “Эрдэнэт үйлдвэрийн ҮЭХ-г шинэчлэх, үйл ажиллагааг сайжруулах хөдөлгөөн”-өөс Эрдэнэт хотод Задгай талбайн “Зад сонгууль”-ийг санаачлан зохион байгуулсан. Өглөөний 06.50 цагаас 22.00 цаг хүртэл явагдсан сонгуулийн дүн гарсан талаар Хөдөлгөөний санаачлагч Ц.Даваажав, ерөнхий зохицуулагч Б.Төгсбаяр нар хэвлэлийн хурал хийсэн юм. Үйлдвэрийн ҮЭХ-ны даргын сонгуульд П.Баттөр, А.Болдбаатар, Т.Соёл-Эрдэнэ, Б.Эрдэнэбаяр нарын дөрвөн хүн нэрээ дэвшүүлсэн. Санал хураалтад үйлдвэрийн 1255 ажиллагсад оролцжээ. Саналын хуудсыг тоолж дүн гаргахад Хүдрийн ил уурхайн ҮЭ-ийн хороны дарга П.Баттөр 1081 хүн буюу 86.1 хувийн санал авч тэргүүлсэн байна. Нэр дэвшигч А.Болдбаатар 104 санал буюу 8.2, Т.Соёл-Эрдэнэ 49 санал буюу 3.9, Б.Эрдэнэбаяр 7 санал буюу 0.55 хувийн санал авчээ. “Эрдэнэт үйлдвэрийн ҮЭХ-г шинэчлэх, үйл ажиллагааг сайжруулах хөдөлгөөн”-өөс энэ үеэр ҮЭХ-ны тэргүүн Н.Батбаатарт итгэл үзүүлэх, эс үзүүлэх талаар уурхайчдаас санал авсан аж. Санал өгсөн нийт иргэдийн 77.8 хувь нь үйлдвэрийн ҮЭХ-ны одоогийн тэргүүн Н.Батбаатарт “Итгэл үзүүлэхгүй” гэсэн хариулт өгсөн аж. Хөдөлгөөний санаачлагчид, зохион байгуулагчдын зүгээс Сонгуулийн санал хураалтын дүнг Н.Батбаатарт танилцуулж, Монгол Улсын Үндсэн хуульд заасан иргэн сонгох, сонгогдох эрхтэй гэсэн заалтыг эдэлсэн эрхийнхээ дагуу дараагийн алхамаа хийх гэнэ. Үйлдвэрийн ҮЭХ-ний даргыг сонгохдоо өмнө нь төлөөллийн зарчмаар буюу нийтдээ 120 хүнтэй хурлаар санал хураалт явуулж тэргүүнийг нь сонгодог байжээ. Тэгвэл уурхайчдын төлөөлөл энэ удаад өөрсдийн эрх ашгийг хамгаалах үйлдвэрчнийхээ тэргүүнийг өөрсдөө сонгоё хэмээн Задгай талбайн “Зад сонгууль”-ийг ийнхүү зохион байгуулсан нь энэ ажээ. [sgmb id="1"]