Орхон аймагт МХЕГ-ын хяналт шалгалтын ажлын хэсэг өнгөрсөн долоо хоногт ажилласан. “Мэргэжлийн хяналтын байгууллага шалгах, торгох, акт тавихаас илүүтэй зөвлөн туслах үйлчилгээг чухалчилна” гэж МХЕГ-ын дэд дарга Г.Сугарбат мэдээлсэн. Хяналтын байгууллагын бүрэлдэхүүн дүнгийн хурлаа олон нийтэд танилцуулсан. Энэ үеэр МХЕГ-ын Эмчилгээний хяналтын чанарын байцаагч Б.Оюунцэцэг аймгийн ЭМГ, БОЭТ-ийн эрхлэх ажлын хүрээн дэх асуудлаар дараахь мэдээллийг хийсэн байна. Б.Оюунцэцэг “Аймгийн Засаг дарга захирамж гаргадаг. Эрүүл мэндийн тусламж үйлчилгээний чанар аюулгүй байдлын салбар зөвлөл ажилладаг. Энэ зөвлөлийг 2013 онд байгуулж, энэ онд бүрэлдэхүүнийг нь шинэчилсэн байна. Гэтэл энэ зөвлөл аймгийн хэмжээний эрүүл мэндийн бодлогыг тодорхойлж ажиллаагүй. Хийсэн ажлын тайлангүй байсан. Иймд Засаг даргын гаргасан шийдвэр орон нутгийн түвшинд хэрэгжихгүй байна. Эрүүл мэндийн байгууллагын тусгай зөвшөөрөл олгодог асуудал аймгийн хэмжээнд шаардлага хангаагүй. Засаг даргын түвшинд ч ийм байна. Эрүүл мэндийн сайдын тушаал шийдвэр хэрэгждэггүй. Тухайлбал, Эрүүл мэндийн тусламж үйлчилгээний чанар аюулгүй байдлын салбар зөвлөл улирал тутам, хагас жилд тайлангаа хийж явах ёстой байтал хэрэгжүүлдэггүй. Мөн тусгай зөвшөөрлийн захирамжин дээр тухайлан оруулсан байгаа. Энэ нь комиссын дарга ажиллах журмыг гаргаж, ажлыг нь чиглүүлэх үүрэг өгсөн байдаг. Энэ журмыг боловсруулж хэрэгжүүлээгүй байна” гэлээ. Мөн энэ үеэр үр хөндөх мэс ажилбарыг хийхдээ аймгийн Засаг даргын захирамжийг үндэслэн явуулдаг гэсэн тайлбарыг мэргэжлийн байгууллага хийсэн нь томоохон алдаа дутагдал гэж байцаагч үзсэн байна. Учир нь Засаг даргын захирамжийн дагуу журам боловсруулан аймгийн ЭМГ, БОЭТ мөрдөж ажиллах үүрэгтэй. Орхон аймаг үр хөндөлт явуулах журмаа мөрддөггүй. Мөн БОЭТ хувийн хэвшлийн эмнэлэгүүдтэй гэрээ хийж, үр хөндөлт бүрээс 8000 төгрөгийн хувь авдаг. Уг ажилбарыг БОЭТ-ийн эмч нар хийх ёстой байтал хувийн эмнэлгийн эмч нар үйлчлүүлэгчийг дагуулж ирэн, тус төв дээр хийдэг зэрэг олон ноцтой зөрчил гарсныг ярьсан байна. Эрүүл мэндийн бодлого тодорхойлогч ЭМГ, БОЭТ зэрэг мэргэжлийн байгууллагууд Эрүүл мэндийн сайдын тушаал, аймгийн Засаг даргын захирамжийн дагуу журам боловсруулан мөрдүүлэх ажлыг орхигдуулсныг МХЕГ-ын Эмчилгээний чанарын хяналтын байцаагч Б.Оюунцэцэг хатуухан шүүмжилжээ. Орхон аймгийн БОЭТ-д мэргэжлийн хяналтын байгууллагын шалгалтаар 116 зөрчил илэрч, үүнээс 49 зөрчлийг нь арилгуулж, “дунд эрсдэлтэй” дүгнүүлжээ. Аймгийн хэмжээнд 199 объект буюу төрийн байгууллага, аж ахуйн нэгж шалгалтанд хамрагдсанаас, БОЭТ гаргасан зөрчлийн тоогоор тэргүүлсэн байна. [sgmb id="1"]