Эрдэнэт хотын цэвэрлэх байгууламжийн ялзмаг лагаас гардаг өмхий үнэрээр Баянцагаан багийн Вокзалын иргэд амьсгалсаар байна. Өмхий үнэр салхи гармагц, бороо орсны дараа ихэсдэг. Зуны халуунд амьсгалахад хэцүү болдог байна. Оршин суугчид, төмөр замын ажилтнууд “Олон жилийн турш 00-д байгаа юм шиг амьдарч, сонгуулийн үеэр дарга нар асуудал болгож яриад ямар нэгэн шийдвэрт хүрэлгүй өдийг хүрсэн” гэж ярилаа.            Өвлийн улиралд цэвэрлэх байгууламжийн лаг хөлддөг учраас үнэр гардаггүй байна. Цэвэрлэх байгууламжинд өргөтгөл хийх ажил 2013 оноос хойш эхэлсэн. “Өргөтгөл ашиглалтанд орсноор лагийг талбай руу ил гаргалгүй хуурай болгох юм. Ингэснээр өмхий үнэргүй болно” гэж Цэвэрлэх байгууламжийн хэсгийн дарга А.Баярсайхан тайлбарлав.            Цэвэрлэх байгууламжид өргөтгөл хийх тухай 1990 оноос хойш ярьж эхэлжээ. 2013 онд цэвэрлэх байгууламжийг өргөтгөхөөр болж, барилгын ажлыг эхлүүлсэн байдаг. Хөрөнгө санхүүгийн асуудлаас шалтгаалж барилгын ажил дуусаагүй байна. Бүгд Найрамдах Франц улсын хөнгөлөлттэй зээлээр өргөтгөлийн санхүүжилтын гуравны хоёр хувийг гаргажээ. Үлдсэн хэсгийг МУ-ын Засгийн газраас гаргахаар гэрээ хийсэн байна. Харин Францын талаас гэрээний нөхцөлийг өөрчилье гэсний дагуу Засаг даргын орлогч С.Батжаргал Францын талын төлөөллүүдтэй уулзжээ. Энэ жилдээ багтаан барилгын ажлыг дуусгах шаардлагыг орон нутгийн удирдлагууд гүйцэтгэгч компанид өгсөн байна. Өнгөрсөн 2014 онд ашиглалтанд оруулж, эргэн төлөлт хийхээр гэрээнд тусгажээ. Хөрөнгө оруулагч талаас эргэн төлөлтийн асуудлыг ярьсан байна. Ашиглалтанд ороогүй, барилгын ажил дуусаагүй учир эргэн төлөлт хийх боломжгүй. Энэ жил орон нутгийн төсөв гурав дахин буурсан. Улсын төсөвт эргэн төлөлтийн асуудлыг хэлэлцэх хүсэлтийг аймгийн удирдлагууд тавьсан байна.        Орхон аймгийн орон сууцны арав гаруй хорооллын бохир ус, өтгөн ялгадас цэвэрлэх байгууламжид ирдэг. Энд ирсэн ялгадас, өтгөнийг ялгаж өтгөрсөн лагийг тусгай хэсэгт хийдэг. Ингэж шингэн ялгадас лагийг талбай руу шууд гаргадаг байна. Үүнээс гарах үнэр салхин доор байрлах Вокзалд үнэртдэг байна. Хурсан ялгадас дулааны улиралд шингэн хэлбэртэй байдаг. Лаг өтгөний ялгадсыг хуурай хэлбэрт оруулж ялгах “Лаг боловсруулах байгууламж” байхгүйгээс өмхий үнэрээр иргэд амьсгалсаар байна. Энэ асуудлыг шийдэхийн тулд өргөтгөлийг яаралтай ашиглалтанд оруулах хэрэгтэй гэдгийг цэвэрлэх байгууламжийн мэргэжилтэн онцоллоо. Ц.Ариунчимэг [sgmb id="1"]