МХЕГ-ын дэд дарга Г.Сугарбатаар ахлуулсан ажлын хэсгийнхэн манай аймагт 10 хоног ажилласан. Энэ үеэрээ “Эрдэнэт үйлдвэр”-т ч хяналт шалгалт хийсэн байна. Үйлдвэрт шалгалтаар ажилласан байцаагчдыг үйлдвэрийнхэн АБК-гийн хоолны газартаа үдийн хоолонд оруулжээ. МХЕГ-ын байцаагчид ч үйлдвэрийн ажилчидтай зэрэгцэж суугаад хооллоцгоосон нь багагүй асуудал үүсгэжээ. Саяхан МХЕГ-т “Эрдэнэт үйлдвэр” ХХК-д хийсэн шалгалтын дүнгийн хурал болж Д.Эрдэнэбилэг тэргүүтэй үйлдвэрийн удирдлагууд оролцсон байна. МХЕГ-ын дарга Д.Цагаанхүү энэ үеэр “Эрдэнэт үйлдвэр”-т шалгалтаар очиж ажилласан байцаагчид үйлдвэрийн ажилчдын хоолноос идсэн байна. Мэргэжлийн хяналтын байцаагчид Орхон аймагт албан томилолтоор ажиллахад нь хоолны мөнгө, буудлын хөлс нь тусгагдсан. Гэтэл төрийн нэр барьж шалгалтаар оччихоод үйлдвэрийн ажилчдын хоолноос идэж ёс зүйгүй үйлдэл гаргалаа. Ингэснээр МХЕГ-ын байцаагчид Ашиг сонирхлын тухай хууль, Төрийн албан хаагчийн ёс зүйн дүрэм, журмыг ноцтой зөрчсөн байна. Үйлдвэрийн ажилчдын хоолноос идсэн байцаагчдын хоолны мөнгийг цалингаас нь суутгаж Эрдэнэт үйлдвэрийг хохиролгүй болго. Д.Эрдэнэбилэг захирал идсэн хоолны мөнгө шилжүүлэх дансны дугаарыг манайханд өгөөрэй” гэсэн аж. Мөн үүнээс гадна МХЕГ-ын байцаагчид АБК-гийн хоолны газрыг 10 үзүүлэлтээр шалгахад нэгд нь зөрчил илэрсэн байжээ. Гэтэл МХЕГ-ын байцаагчид дээрх зөрчлийг тодорхой хэмжээнд “нуун дарагдуулсан” нь Ерөнхий газрын дарга Д.Цагаанхүүг багагүй бачимдуулахад хүргэсэн байна. Хоолыг нь идсэн юм чинь зөрчилтэй гэж дүгнэж болохгүй хэмээн зарим нэг байцаагч шалгалтын дүгнэлтэд энэ тухай оруулаагүй бололтой. Энэ бүхэн Д.Цагаанхүү даргыг “Идсэн хоолныхоо мөнгийг төлж үйлдвэрийг хохиролгүй болго” гэж лүндэн буулгахад хүргэсэн гэнэ. Саяхан МХЕГ-ын байцаагчдын идсэн хоолны мөнгө үйлдвэрийн дансанд шилжин орсон тухай сураг ажиг дуулдана. Монголын уран сайхны нэгэн кинон дээр их жанжин Д.Сүхбаатар “Ардын журамт цэргүүд ард түмнээс сэтэрхий тэвнэ, сиймхий хадаг ч авч болохгүй. Авсан хүнийг хамгийн хатуугаар шийтгэнэ” гэж хэлдэг. Жанжны тэртээ XX зууны эхээр хэлсэн тэр үг энэ цагт Мэргэжлийн хяналтын салбарт биелэлээ олж байх шиг. [sgmb id="1"]