Засаг даргын зөвлөлийн хуралдаанаар “Багш”, “Эмч” дэд хөтөлбөрийн төсвийг баталлаа. Эдгээр дэд хөтөлбөрт багш, эмч, ажиллагсдын нийгмийн асуудлыг шийдвэрлэх, зээл тусламж олгох “Нийгмийн дэмжлэгийн сан” байгуулахаар тусгажээ. Орхон аймгийн Засаг даргын 18 дэд хөтөлбөрийн дотор “Багш” , “Эмч” дэд хөтөлбөр багтсан юм. Хөтөлбөрт цалин хангамж муутай багш, эмч, ажиллагсдын нийгмийн асуудлыг шийдэх, тэдэнд зээл тусламж олгох зэрэг ажлуудыг хийхээр төлөвлөсөн байна.      Багш, эмч эмнэлгийн ажиллагсдад зориулсан дээрх хөтөлбөрт хүнээ хөгжүүлэхэд илүү анхаарлаа хандуулна гэдгийг зөвлөлийн гишүүд онцолж байсан. Тухайлбал “ Нийгмийн дэмжлэгийн сан” байгуулж, хүүгүй зээл, тусламж олгох юм.      Нийгмийн бодлогын хэлтсийн дарга А.Бумансор “Хүнээ хөгжүүлэх бодлогоор хувь хүнийг хөгжүүлэх, чадавхижуулах, тэдний амьдралд тулгамдаж буй асуудлыг шийдвэрлэхэд тусална. Эрүүл мэнд, боловсролын салбарын багш, эмч, ажиллагсдыг гадаадын оронд сургалтанд хамруулж, туршлага солилцуулна. Тодорхой шалгуур тавьсны дүнд эмч, сувилагчийг хамтад нь явуулна” гэж ярилаа.        Боловсролын салбарын хөгжилд Хүүхдийн номын төв байгуулах тухай Засаг даргын зөвлөлийн хуралдаанаар хэлэлцэж, дэмжсэн байна. Номын төв байгуулах талаар Боловсролын яаманд хүргүүлж, байрлах газрыг судлахаар болжээ. [sgmb id="1"]