Хүний нөөцийн хэлтсийн дарга Д.Халтар аймгийн ИТХ-ын төлөөлөгч Р.Рагчаагийн “чөлөөтэй” байх хойгуур байгууллагын даргын үүргийг түр орлон гүйцэтгэгчээр ажилласан. Тэрбээр 2016 оны таваас наймдугаар сарын дунд хүртэлх хугацаанд ажиллахдаа “НИК” ХХК-ийн дөрөвдүгээр ШТС-аас Хот тохижуулах газрын үйл ажиллагаанд зарцуулах А-80 болон ДТ маркын шатахууны оронд 3.8 сая төгрөгийн АИ-92, АИ-95 маркын бензин сольж авчээ. Хот тохижуулах газрын хог ачдаг “ЗИЛ-130” машин болон Дизель түлшээр явдаг өөрөө буулгагчууд нь Д.Халтарын үед гэнэт АИ-92, АИ- 95 бензинээрявдаг ид шидтэй болсон бололтой. Д.Халтар дарга 2016 оны таваас наймдугаар сарын хооронд 20 удаагийн үйлдлээр 3.8 сая төгрөгийн үнэ бүхий АИ-92, АИ-95 маркын бензин авсан нь захиалгын хуудсанд бичигдээгүй алга болжээ. Одоогийн дарга, аймгийн ИТХ-ын төлөөлөгч Б.Оюунбаяр 2016 оны 12 дугаар сарын 22-ны өдөр А-71 тоот тушаал гарган цалингийн зардлаас хэмнэгдсэн 7.3 сая төгрөгийг шагнал, урамшуулал нэрээр ажилчидтайгаа нийлээд хуваагаад “хүртчихэж”. Хамгийн сонирхолтой нь Б.Оюунбаяр дарга А-71 тоот тушаалдаа “дээрх 7.3 сая төгрөгийг ажилтан албан хаагчдын ажлын үр дүнг дүгнэн нэмэгдэл хөлс олгосугай” хэмээсэн атлаа зорилгоосоо зөрөөд эн тэнцүүхэн, хал балгүйхэн, эхийг нь эцээж тугалыг нь тураалгүй хувааж “иджээ”. Аймгийн Хот тохижуулах газар үүрэг, статусын хувьд Улсын үйлдвэрийн газар хэдий ч энд АН, МАН-ын үед улс төрийн зорилготой улстөрчдийн томилгоо хийгдэж байна. Р.Рагчаа дарга сонгуульд нэр дэвших боломжгүй болонгуутаа “Намайг эргүүлээд Хот тохижуулахын дарга болгоод өг” хэмээн аймгийн Засаг дарга асан С.Дангаасүрэнг долоо хоног шаналгасан гэдэг. Одоогийн дарга Б.Оюунбаяр нь тун удахгүй МАН-ын Ардчилсан социалист эмэгтэйчүүдийн холбоо /АСЭХ/-ны дарга болох гэж байгаа зэрэг нь АН, МАН-д тус байгууллагын жилийн 2.8 тэрбум төгрөгийн төсвөөс намаа, өөрсдийгөө угжихад том боломж болж харагдаад байна гэж үү. Хэрвээ Б.Оюунбаяр дарга аймгийн МАН-ын хорооны дэргэдэх АСЭХ-ны дарга болвол Хот тохижуулах газар улс төрийн байгууллага болох дээрээ тулна. Өөрөөр хэлбэл, аймгийн МАН-ын хорооны дэргэдэх “АСЭХ-ны Хот тохижуулах газар” гэж ойлгогдоно. Түүнээс биш Б.Оюунбаярын хувьд Хот тохижуулах газар хийх ажил их бий. Юун ТББ-ын дарга болох манатай. Аудитын дүгнэлтээс харвал 2016 оны санхүүгийн жилд Хот тохижуулах газар 149.3 сая төгрөгийн санхүүгийн зөрчилтэй гарчээ. Зөрчил гэдгийг “идчихэж” гэж ойлговол Р.Рагчаа, Д.Халтар, Б.Оюунбаяр нар тус байгууллагын 2.8 тэрбум төгрөгийн төсвөөс 149.3 сая төгрөгийг зориулалтын дагуу зарцуулаагүй, нягтлан бодох бүртгэлд тусгалгүй үгүй хийсэн бололтой. [sgmb id="1"]