Эцэг эхчүүдийн хүсэлтээр манай аймагт зуны гурван цэцэрлэг ажиллахаар болсон. Баян-Өндөр сумын Говил багийн хоёрдугаар цэцэрлэг, Хүрэнбулаг багийн 19-р цэцэрлэг болон Жаргалант сумын цэцэрлэгүүдэд зуны салбар бүлэг хичээллэх юм. Одоогийн байдлаар Говил багт 57 хүүхэд зуны цэцэрлэгт хамрагдсан байна. Тус багийн хоёрдугаар цэцэрлэгт гэр цэцэрлэг ажиллуулж байна.        Говил багийн хоёрдугаар цэцэрлэгийн эрхлэгч Ц.Дэнсмаа “Зуны салбар бүлэгт хичээллэснээр хүүхэд нарны гэрлээр D амин дэм авах, агаар салхинд чийрэгжих ашиг тустай” гэдгийг хэллээ. Тус цэцэрлэгт хүүхдүүддээ зориулж сүү цагаан идээ тогтмол өгч, гадаа усан сантай элсэн дээр тоглуулж байв. Өвлийн турш битүү байшинд байсан хүүхдүүд агаар салхинд байснаар хоол ундандаа сайн болдог байна.      “ Хүүхдийг шар сүү, хар цай, ясны шөлд оруулж, агаар салхинд гаргаснаар борогшдог. Ингэснээр өвлийн цагт ханиад томуу тусах нь бага байдаг” гэж Хоёрдугаар цэцэрлэгийн багш Х. Амарсанаа тайлбарласан юм.      Говил багт зорилтот бүлгийн өрхийн хүүхдүүд их байдаг учраас нэг өдрийн төлбөрийг 1000 төгрөг байхаар тогтжээ. Зуны турш хүүхдийг чийрэгжүүлэхээр гадаа элсэн талбайд гаргаж, гэрт байрлуулсан байна. Энэ нь хүүхдийн бие бялдар өсөлт хөгжилтөд эерэгээр нөлөөлдөг байна. Зуны салбар бүлгүүд 7-р сарын 1-нийг хүртэл ажиллана. Цэцэрлэгийн зүгээс усан сантай элсэн талбайг эцэг эхчүүд, ААНБ-тай хамтран тохижуулсан байна. Харин хүүхдийн тоглоомын талбай хуучирсан, стандартад нийцэхгүй байгаа. Орон нутагт санал тавьсан ч энэ жилийн хувьд шийдэж чадаагүй гэдгийг тус цэцэрлэгийн эрхлэгч хэллээ. [sgmb id="1"]