Иргэд худалдан авсан бараа бүтээгдэхүүнийхээ баримтыг тэр бүр авч чадахгүй байгаа. Аж ахуйн нэгжүүд НӨАТ-ын тухай хуулийг хэрэгжүүлэхэд тодорхой арга хэмжээ авахгүй хүндрэл үүсгэдэг гэдэг санал, хүсэлтийг аймгийн Засаг даргын уулзалтын үеэр иргэд гаргаж байсан. Иймд аймгийн ЗДТГ-ын Төрийн захиргаа, удирдлагын хэлтсээс холбогдох албаныханд хандан тодорхой үүрэг, даалгавар өгсөн билээ. Уг ажлын хүрээнд аймгийн хэмжээнд “Нэмэгдсэн өртгийн албан татварын тухай хууль”-ийн хэрэгжилтийг эрчимжүүлэх ажлын төлөвлөгөө боловсруулан хэрэгжүүлж байна. Аймгийн татварын хэлтсээс“Төгөл”, “Баян” худалдааны төвд үйл ажиллагаа явуулж байгаа бизнес эрхлэгч, аж ахуйн нэгжүүдийг нэгдсэн системд бүрэн холбож, бараа ажил үйлчилгээ худалдан авсан иргэдэд төлбөрийн е-баримт олгох нөхцөл бүрэн бүрджээ. Мөн “Хүлэг”, “Бичил”, “Эрдэнэт импекс”, “ЦАХ” гэсэн төвлөрсөн хүнсний зах, худалдааны төвүүдэд ажлын хэсэг батлагдсан удирдамжийн дагуу ажилласан байна. Энэ үеэр үйл ажиллагаа явуулж буй бизнес эрхлэгч, хувь хүн, хуулийн этгээдийг цахим төлбөрийн баримтын нэгдсэн системд хэрэглэгчээр бүртгэх, худалдан авагч нарт төлбөрийн баримт олголтонд хяналт тавихын зэрэгцээ илэрсэн зөрчил, дутагдлыг газар дээр нь арилгууллаа. [sgmb id="1"]