Аймгийн Засаг даргын орлогч А.Түвшинжаргалтай “Соёлыг түгээе” аяны талаар ярилцлаа.

“Соёлыг түгээе”  аян орон нутагт өрнөж, хүрээгээ ч нэлээн тэлж байна. Аяны хүрээнд өөр ямар ажил хийхээл төлөвлөж байна вэ?

“Соёлыг түгээе” сарын аяныг зохион байгуулах Ажлын хэсэг  аймгийн Засаг даргын захирамжаар байгуулагдсан. Ажлын хэсгийг миний бие ахалж байна. Ажлын хэсэг 20 гаруй хүний бүрэлдэхүүнтэй, салбар бүрийн төлөөлөл багтсан. “Соёлыг түгээе” гэдэг зүйлийг зөвхөн дуу хуур гэж ойлгож болохгүй юм шиг санагдсан. Жишээлбэл, аймгийн Засаг даргын Тамгын газар дээр Эрдэнтийн дийлэнх иргэд орж үзээгүй.  Тэгвэл энэ гурван давхар барилгын хаана нь, хэн нь ямар чиг үүрэгтэй ажил хийдэг вэ гэдгийг нэг давхрын угтах үйлчилгээний хүнээр хэлүүлэх боломжтой. Эсвэл схем зураг хийгээд байрлуулах хэрэгтэй. Иргэдийн хувьд төрийн байгууллагууд ийм зүйл хийгээсэй гэж хүсэж байгаа. Төрийн үйлчилгээг сайжруулахын тулд иргэн, төр хоёрын хамтын ажиллагаа шаардлагатай. Иргэд өөрсдөө бухимдалтай, характаризм өндөр  байх юм бол төрийн албан хаагчдад хүндрэлтэй. Манай аймгийн Онцгой комисс, Онцгой байдлын газар, эрүүл мэндийн салбарынхан нэг л зүйлийг хэлж байгаа. Ажлаа хийхэд, өвчтөнөө эмчлэхийн тулд бид илүү цагаар ажиллахад ямар ч зовлон бэрхшээл алга, тангараг өргөсөн хүмүүс учраас. Харин иргэдийн сошиал орчинд худлаа гүтгэдэг, хэргээр сенсаци болгодог  зүйл бидний сэтгэлийг эмзэглүүлж байна гэж хэлдэг. Ийм учраас сошиалд ч гэсэн сайн зүйлийг түгээгээсэй.  Монгол орны хаана сайн сайхан зүйл болж байна, Эрдэнэт хотын гэрэлтэй гэгээтэй гэдэг юм хаана байна гэдгийг харуулсан ийм олон контент хийе гэж бодож төлөвлөж байгаа.

Соёлыг түгээе аяны хүрээнд хувь хүн, Эрдэнэт хотын иргэд ямар оролцоотой байгаасай гэж та иргэн хүнийхээ хувьд бодож байна вэ? -Эрдэнэт хот, Эрдэнэтийн иргэд бол орос школатай. Оросын соёл, уламжлалыг өөртөө илүү их шингээсэн хот учраас айл болгон серванттай байдаг. Сервантан дотроо юу хийдэг билээ гээд та бүхэн эргээд нэг бодоод үзээрэй. Тэр дотор байгаа зүйлүүдийнхээ оронд ном хийе л дээ. Эрдэнэтчүүд гэрийнхээ хоймортоо ном залъя. Энэ чинь их гоё соёл. Ийм учраас Эрдэнэт хотын удирдлагуудын зүгээс номын зохиолчид, номын компануудад өөрсдийнх нь зардлаар биш аймаг орон нутгийн төсвөөс зардал мөнгийг нь гаргаад, байрных нь зардлыг гаргаад, ирж очих төмөр замын билетийг нь даагаад 60-70 хүн авчирч хоёр өдөр Амарын талбайд Номын худалдаа зохион байгууллаа. Зохиолчдын төлөөлөлтэй уулзахад “Эрдэнэт хотын иргэд үнэхээр күүл байна аа” гэж дуу алдсан шүү. Залуус хүүхдүүд ирж байна, маш сайхан байна гэж баярласан сэтгэлээ илэрхийлж байсан. Манай Эрдэнэт хотын иргэд ном унших соёл, номоор цангаж байгаа байдал их байна. Тийм учраас бид жил болгон энэ “Номын баярыг” зохион байгуулна. Мэдээж зохиолчид ирж ашиг, орлого олж байгаа ч гэсэн ингэж л дэмжлэг үзүүлэхгүй бол тэр олон номыг авчрах боломжгүй. Ихэнх зохиолчид өөрийнхөө авчирсан бүтээлийг Эрдэнэт хотын иргэдэд зориулаад дуусгаад явсан байгаа. Зохиолчдыг авчраад зүгээр байлгаагүй. Чиглэл чиглэлээр, салбар салбарынх нь хүмүүстэй уулзуулсан. Лекц зохион байгууллаа. Орхон аймгийн номын санч нартайгаа уулзуулж номын сан гэдэг чухам юу юм бэ, номын сангийн зохион байгуулалт ямар байх ёстой вэ, ирээдүйн хөгжлийн чиг хандлага ямар байх вэ гэх мэт зүйлийг ярилцлаа. -Нэг үгээр хэлбэл “Соёлыг түгээе” аянд эрдэнэтчүүд эрвийх дэрвийхээрээ л оролцож цар тахлын хүнд хэцүү цаг үед нэг, хоёр өдөр ч гэсэн стресгүй, бухимдалгүй байж чадлаа? -“Соёлыг түгээе” аяныг яагаад гэв гэнэтхэн зохион байгуулаад унав аа гэж иргэд минь гайхаж байгаа нь үнэн. Ковидын үеийн сэтгэл гутрал, сэтгэл хямрал, энэ стрессийг соёл урлагаар дамжуулж, оюунлаг бүтээлээр дамжуулж соён гэгээрүүлэх ажил руу хандуулахад жоохон ч гэсэн нэмэр болоё гэж бодож хийсэн. Өмнө нь Соёлын сарын ажил гээд жил болгон ажил зохион байгуулж байлаа. Энэ удаад арай өөр зохион байгуулалтаар хийхээр төлөвлөсөн. Иргэд цар тахлаас болоод дуу хөгжим сонсохгүй, салхинд ч гарахгүйгээр гэртээ олон удаа хөл хорионд орсон. Өвчлөл их байгаа учраас сэтгэл зүйн хувьд бараг нэг ёсондоо хямрал, гуниг гутрал руугаа орж байна. Үүнээс үүдэн энэ жалыг зохион байгуулахаар болсон. Бид ковидын дараахь эдийн засгийг сэргээх гэхээсээ илүүтэйгээр хүмүүсээ сэргээх тийм арга хэмжээ хийж байгаа гэж ойлгож болно.